Uwa yahkhmat ka Congress, u Rahul Gandhi da pynbaad u ya ka BJP kam kawa pyrchang wow pyndooh ya ka dustur riti, u ktien i thylliej wa ka niam ha ka jylla Meghalaya.
Hawa e yei klam ha ka yalang paidbah ynne wa da pynman ha madan Malki ha Shillong, u Rahul da ong u, “I daw wa da wan u cheini toh ka yurim ka BJP wei khamtam ka RSS kiwa pyrchang wow pyndooh ya ka riti dustur, ka niam yong phi wei nga wan O heini yow khana ya phi wa nga yieñ O wow yaleh pyrchah deilang wa phi wei wym e laad ya ki yurim ka BJP wow ktah ko yei ktien i thylliej, ka dustur riti, ka rukom im waka niam yong phi.”
“Ka BJP da hiar thma ko ya waroh ki jylla i nadooh ka Tamil Nadu, Karnataka, Meghalaya, Jammu and Kashmir, Haryana. Waroh ki jylla da chah hiar thma ki leh ha ka RSS deiwa pynbor yei rukom pyrkhat yong ki wei ini waroh toh iwa i ym ye i wow pdiang wei hap wow leh pyrchah,” da ong u Rahul Gandhi.
Da kynthah u leh ya ka TMC deiwa pynkynmoo ya ki paidbah ya ki yakhih, kiwa mynsoo, ki kaam baamtooh wa i rukom synchaar paidbah wa yoo chirkhei ha West Bengal. “Tip bait phi yei parom ka TMC, ki yachoh yadat wa da jia ha Bengal, tip phi ya ki kaam baamtooh kam ka Sharda Scam kawa da dep jia wei toh u tip phi yei rukom krehkaam ki”, da ong u Rahul Gandhi.
Da pynbaad u leh wa ka TMC kamwa leh ko ha Goa, hapoh Meghalaya leh toh u yarap pynkhlan ya ka BJP.
“Da wan ki ha Goa wei da pynlut ki chiboon bha ka poisa wei i buit toh yow yarap ya ka BJP wei ini toh i jooh ha Meghalaya. I buit ka TMC toh wow pynkhlan ya ka BJP dep tæ yow wan ko hei bor”, da ong u.
Ha iwi won i liang da ong u wa ka Congress hapoh ka jylla Meghalaya i thong ko toh wow pynyatoh wa kiwa thap Vote kiwa dang khynroo deiwa em ki leh chiteiñ ki kyrtong kiwa em hapoh 45 snem, wei i thmu toh wow wanrah ya ka sorkar wa dang khynroo ka Meghalaya.
“Da em 5 tylli ki kular wa da e i. Nyngkong toh wow pynkupbor ya ki kynthai wei daw e yarap ya ki manbei wa psa khon samen kiwa dooh wa duk T. 3000 chi bnai iwa mut T. 36,000 chi snem man-u-snem. Daw pynduna leh yei dooh kreh deiwa e kreh ya uwi na kawi ka manyung ha Meghalaya, wei daw pyntikna leh wa ki paidbah ka Meghalaya u yoh ki ya ka bordiñ ka wym thut ha ki yung wa kamjooh leh ki karkhana. Daw yaleh pyrchah i leh yei drugs wei wow pynlait leh ya ka Meghalaya na kiwa dai drugs wei daw e yarap leh ya kitu kiwa da chah kdoh chah khoom hei drugs deiwa booh ya ki Rehabilitation Centre,” da ong u Rahul Gandhi.
Da kular u leh wow wanrah ya ka aiñ wa thymme wow yaleh pyrchah ya ki kaam baamtooh mar ya yoh u chna sorkar wei ki Scheme wa i rukom pynlai poisa leh u man ko iwa khooid.
I wan u Rahul Gandhi cha Meghalaya toh yow yalap Election neibynta ki kyrtong ka Congress heiwa ynne ha Shillong da emlang leh ki kyrtong kam u Vincent Pala, u PN Syiem, u Ronnie V Lyngdoh, u Manuel Badwar, u J.A. Lyngdoh wa kiwi de kiwa daw yakhun MLA na ka Party ha uni u snem.
