Shillong: U Chairman ka Khasi Hills Autonomous District Council (KHADC), u Pynshngain N Syiem da ong u wa i beh ka NPP ya oo na ka Party toh neidaw wa pynlai u ya ka dorbar katkam ka aiñ.
Da pynrap u leh deiwa ong wa chah beh u neidaw wa e Vote u cha ka liang wa wanrah yei wym chaniah de ya ka Executive Committee warim, wei u Lat ka jylla leh ym em mynjur u yei dawa ka sorkar wow pynkrehkaam da ka Administrator’s Rule ha KHADC.
U Pynshgain da ong u wa i kyrchaan ya ka liang pyrchah man i katkam ki kyndon ka aiñ wei kam u Chairman ha KHADC, ye u wow pynemkaam yeini i bor wow jied ya ka liang synchaar namo wa pyrchah.
Hajrong i chah beh seiñ da ong u man i i por wa bakla neibhah ki MDC ym pyrchah ki ya ka Party tangwa ye ki wow pyrchah ya i rukom krehkaam ka Executive Committee deiwa pynrap yei phylla wa ka NPP khlem i paan pynche da beh ko ya oo.
Chooh chooh da ong u wa ki MDC ye ki wow kyrchaan ya kiwa ngait ki neibynta i bha i miat ki paidbah.
Hawa kylli, u Chairman ka KHADC uwa man leh u MDC ka Mawkhar-Pynthorumkhrah da ong u wa ya katni ym pu em pyrkhat u wow psiah cha kawon kawon ka Party, tangwa u neh u kam u MDC wa khlem seiñ wei u pteiñ u ya ka kaam Chairman.
Discussion about this post