U Montri Rangbah ka jylla, u Conrad K Sangma da khana u wa u heh pulit wa da kem ynnin ka sngi, u Gabriel K Iangrai ym toh wa da kem ya oo hajrong i chah pynbaad emkti ha ki kaam baam-tooh wa yatoh wow thied ya 29 tylli ki kari yong ka chnat pulit, tangwa da kem hajrong i pynemkaam bakla ya ka poisa hawa yatoh wa kawi ka kaam kreh hapoh ka chnat pulit.
Da ong u wa ini toh i pynche wa ym em chah kem hajrong ki kaam thied kari, wei hawa yatoh wa i thied kari ym ye wow ong wa toh i kaam baam-tooh tangwa toh hajrong i chimkti ya ki kari. Da ong u leh wa ya u Iangrai da kem hajrong i pynbaad wa da pynemkaam bakla ya ka poisa hawa yatoh wa i chna ya ka kawi ka yung krehkaam ka chnat pulit, wei hajrong ini da em leh ka ujor.
U Conrad da ong u wa ya katni ka takit dang lai ko wei daw leh katkam ka aiñ. Hawa kylli da ong wa hadooh katni ym pu tip da chah Suspend namo ym em nei kaam.
Kam wow kdaw heini wa u Iangrai da chah pynbaad u wa emkti u ha ki kaam baam-tooh hawa yatoh wa i chna ya ka National Emergency Response System (NERS) ha Sadar Police Station kawa dapoi cha T. 3 klur.
