Shillong: Hadien wa mih ka khubor wa ong wa ka Central Executive Committee yong ka UDP da phah ko ya ki MDC yong ka wow dam noh u kyrchaan ya ka People’s Democratic Forum (PDF) ha KHADC, neiliang u Pynshngaiñ N Syiem ynnne ka sngi hei yachem u wa kiwa thoh khubor da ong u wa ka UDP da leh ko yeiwa leh ko neidaw wa da jan ka Election MLA.
U Pynshngaiñ da ong u wa ka UDP toh u klam ko deiwa che wa yei pyndam yei kyrchaan ya ka PDF wa toh wa da tyngkhooh wa ka MLA Election neibhah boon ki MDC kiwa em hapoh ka PDF daw yakhun ki pyrchah ya ki kyrtong ka UDP.
“Ka UDP e daw hi-eh ko wa ka EC hapoh i yahkhmat yong nga wa emkti ko ha ki kaam baamtooh wei pynemkaam bakla ko ya ka poisa ka Council kawa ym em yurim iyi iyi leh.” Da ong u PN Syiem.
Da sait khooid u leh deiwa ong wa ka UDP da pynbaad ko waka EC baam-tooh wei ym pynman ya ka Magisterial Enquiry yow pynsakhiat yeini.
Hei yatoh wa ka poisa wa e ram cha ka KHCF ha u snem 2013 neiliang u CEM da pyntip u wa i lut i sep da soi pyrtuid lang wa u Member Secretary chirup wa u Chairman ha itu i por u Tituswell Chyne wei ym em iwon iwon wa pynemkaam bakla ya ka poisa wei ha u snem 2016 ka KHCF da pynuiñ ko yaka poisa wa chim ko naka KHADC.
U CEM ka KHADC leh da pyntip u wa hadoh ynne ympu em yoh ko ya ka chithi neiliang u PP Leader ka UDP namo na ki MDC daw da dam ki u kyrchaan ya ka PDF. Da ong u leh wa ym pynhiar chuki ki ya ki MDC ka UDP. Da ong u leh wa na pyrdi yong ki dang em kiwa kyrchaan ya ka PDF wei em leh kiwa dang yang yei rai ka CEC.
“I lai tynrooh yong ka UDP cha ka ophis u Lat da che wa ka kwah ko u wanrah ya ka Administrator Rule hapoh ka KHADC wei hadooh katni ka PDF dang boon paaid ko wei ka ym em ko i thmu wow elaad ya ka Adminstrator Rule hapoh ka KHADC.” Da ong u PN Syiem.
Also Read: Rai ka UDP wow dam noh na ka PDF ha KHADC
Discussion about this post