U Montri Rangbah ka Meghalaya, u Conrad K Sangma ynne i step da lai pait u ya i yung wa da baam lut i diñ hei sngi ka 14 tarik iwa em hajan ka Payal Cinema ha u sarok Jail Road, Police Bazar heiwa da chimpor hadooh jan dap 24 kynta yow ye u tympleh yei diñ wei dang em wa sdang biang u kop hadooh ynne i step wei i daw toh wa ya ini i yung da pynemkaam kam ka kudam wei em nadooh ki chuki wa kiwi ki mar Plastic.
Deilang wa u Montri Rangbah da em leh wa u Chief Secretary, u DP Wahlang, u DGP LR Bishnoi wa kiwi ki heh sorkar.
Neiliang u Conrad da phah u leh wow pait wa lada ini i yung man i iwa dang chnaaiñ, yow tip leh yei daw wa sdang i diñ wei wow phah ya ka Report cha oo neibhah ha ini wa jia da em leh uwi uwa da dooh yei mynsien.
U Conrad da e khublei u leh ya waroh kiwa da wan yarap nadooh ki Fire Service, Army, Air Force, Assam Rifles, BSF, Police, ki bor District wa kiwa chong chnong neibhah ini i yung em i ha i thaw wa khynnia bha wei iwa ye u poor cha kiwi ki yung.
Chooh chooh da ong u leh wym toh iwa suk u poi ki kari cha ini i thaw wei waroh iwa da ye u leh da pynlait ko nei jia chooh chooh iwa sñiawsih.
“Daw pait bniah bha i kammon u leh yow pyntikna wa iwa jia kamni ym jia de i neini chakhmat”, da ong u Conrad deiwa pynrap u wa daw rah yeini hapoh ka Cabinet ha ka 18 tarik uni u bnai.
Discussion about this post