I daw wa kyrchaan ka Congress ya ka PDA toh wow yatylli wow kreh neibynta ki phang wa emkaam: PT Sawkmie

Shillong: Ki MDC ka Congress da pynsñiaw ki wa i lai kyrchaan ki ya ka People’s Democratic Alliance ha KHADC toh wow pynkhlan chooh ya i yakhih wow kyrriah ya ka Harijan Colony na Them Iewmawlong, kawa da wanrah yei yakhih wa joor ha ki tayaw wa dadep.

Hawa yaklam wa kiwa yahkhmat ka Congress uwa man leh u MDC/MLA ka Mawlai, u PT Sawkmie, da ong u i daw wa hakhmat dooh i lai kyrchaan PDA ha KHADC man ko wow e bor yow kreh ya ki phang kiwa ktah ya ka jaitbru kiwa emkaam wow krehlang yow yoh u khait ya u soh.

Da ong u wa kini ki phang kynthup ki ya i kyrriah noh ya ka Harijan Colony na Them Iewmawlong wa i thmu yong ka sorkar India wow pynkylla ya ka aiñ chong chnong, ka Citizenship (Amendment Bill) 2016.

Heiyatoh wa i kyrriah ya ka ya ka Harijan Colony, neiliang u Sawkmie da ong u wa ka KHADC ka em ko ya i bynta wa kongsan hajrong kani ka kaam deilang wa i krehlang waka Hima Mylliem neibhah ka thaw haap ko hapoh ka Hima Mylliem waka KHADC. Da pynrap u deiwa ong wa i krehlang ha KHADC wa waroh ki MDC daw ye ko u yarap wow e yumut ya ka Executive Committee ya ki luti wa toh wow lai chakhmat heiyatoh wa kani ka kaam.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u leh wa dang em boon ki phang wa ki MDC ka Congress wow rah ki hakhmat ka Council, wei neiliang u Sawkmie da ong u wa i krehlang ha KHADC ym em mut wa kam ki MDC u dam ki wow klam namo wow kylli ya i rukom krehkaam ka Executive Committee wei lada em iwon iwon i duna ki MDC em ki i hok wow kylli wei wow paan pynche.

U Sawkmie da ong u leh wa i kyrchaan ya ka PDA toh wa hadien wa ha kani ka synrop sorkar ym em de ka BJP.

Heijooh i por, uwa yahkhmat ka Congress uwa man leh kam u Chief Whip ha ka yung dorbar chna aiñ da kyntait u wa ini i lai luti ha KHADC toh wow khroh ya ki Party kiwa em ha ka sorkar synrop MDA wow pynkhih ya ka sorkar neibhah ka Congress u chong bait ko chwa ha ka liang pyrchah ha ka yung dorbar chna aiñ ka jylla.

Ha iwi tawon i liang, uwa yahkhmat ka Congress Legislature Party (CLP) ha KHADC, u Lamphrang Blah da pynsñiaw u ya i jooh i daw wa i kyrchaan ya ka EC wa yahkhmat da u Pynshngain N Syiem ha KHADC toh neidaw wa kwah ki wow pynneh wei wow pynkhlan ya ka yakhun ya ka kaam kharmator ha Them Iewmawlong.

Heiyatoh won wa i chah pynbaad wa i lai kyrchaan ka Congress ya ka PDF toh neidaw wa da em i pyrchang wow pynhaap ya ka EC da ka NPP kawa yahkhmat da ka sorkar jylla, u Lamphrang da ong u wa i por wow pynhaap wow pynkhih ya ka EC ym em yumut de ko neibhah i por da jan poi i wow lai yaleh Election noh ha u snem wow wan wei katni i por toh wow pyllai yumut ya ki kaam.

Heijooh i por da ong u wa i lai kyrchaan yong ki ym ktah ko iyi iyi leh ya ka Party neibhah ki yieñ ki neibynta u paidbah wei da ong leh wa chwa wow kyrchaan ya ka PDA da e yaklam leh chaphang ini wa ka MPCC.