Ka Independence Day Cup Under-17 Football Tournament-2022 ka West Jaiñtia District Sports Association (WJDSA), ynne ka sngi da poi ko cha ka sngi wa 18 deiwa pteiñ ya ar tylli ki yalehke kiwa man leh kam ki Pre-Quarter.
Ha ka yalehke wa nyngkong, ka Luti Tuber Ialong da jop ko ya ka 7 Wasa da 4-1. Ya ka Luti Tuber Ialong da thap kool da u Richard Dhar ha ka minit wa 36 wa u Iohbhah Dhar ha ka minit wa 5, 42 wa 43. Katwa ya ka 7 Wasa won da thap da u Sambha Ryngkhlem ha ka minit wa 41.
Ha ka yalehke wa ar, ka Sailung Ialong da jop ko ya ka Iawmulong Nartiang da 4-0 lyngba ki kool wa thap u Bashanbor Pale ha ka minit wa 13,15, 21 wa 60+1.
