Ka Synjuk ki Rangbah Shnong na thaaiñ khappood wa ka Assam da yachem ki ya u Montri Rangbah wow pynsñiaw wa kwah ki wa ki 18 tylli ki chnong wa em ha Block II u chah kynthup noh ki cha ka jylla Meghalaya.
U Chairman ka Synjuk, u Blikstar Sohtun da ong u wa i kwah ki 18 tylli ki chnong wow em ha Meghalaya toh neidaw wa man ki ki chnong Khasi nadooh ki spah snem nachwa wei haap ki hapoh ka Raid Nongtung ka Hima Khyrim. Da ong u wa ka Raid Nongtung em ko hadooh 34 tylli ki chnong, ya kiwa ka Assam da chim noh ko wei da sah sa 18 tylli ki chnong wa pynhaap hapoh ka Block II.
Da ong chooh chooh u wa i kwah wow em ha Meghalaya toh neidaw wa kini ki chnong hap ki hapoh i pait ka Hima wa ka Raid, wei khamtam wa kiwa chong chnong toh ki Khasi, ymtip ki ya i ktien thylliej wow yaklam wa ki bru Assam, wei khamtam wa pyndep ki ya ki rukom im waka riti dustur ki Khasi.
