August 2, 2022
Advertisement
Ka Independence Day Cup Under-17 Football Tournament-2022 ka West Jaiñtia District Sports Association (WJDSA), ynne ka sngi da poi ko cha ka sngi wa khat-le deiwa pynman le tylli ki yalehke.
Ha ka yalehke wa nyngkong, ka Mookyrdur da jop ko ya ka 7 Wasa da 3-2. Ya ki kool ka Mookyndur da thap da u Lewotki Pariat (OG) ha ka minit wa 7, u Patiently Lakuna ha ka minit wa 28 wa u Soobiang K. Pomtiah ha ka minit wa 36. Ya ka 7 Wasa won da thap da u Kerlangmi ha ka minit wa 10 wa u Sambha Ryngkhlem ha ka minit wa 16.
Ha ka yalehke wa ar, ka Mookyrdup da jop ko ya ka Catholic Youth Mihmyntdu da 7-0 da ki kool wa thap u Gentes Tariang ha ka minit wa 12 wa 40, u August Surong ha ka minit wa 42, u Hamsilet Lakuna ha ka minit wa 46 wa u Kynmole June Kyndait ha ka minit wa 50, 57 wa 59.
Ha ka yalehke wa le, ka Luti Tuber Ialong da jop ko ya ka Mukhla Raij da 3-1. Ya ka Luti Tuber Ialong da thap kool da u Bishar Lhuid ha ka minit wa 31, u Richard Dhar ha ka minit wa 49 wa u Shwaki Dhar ha ka minit wa 59. Ya ka Mukhla Raij da thap kool da u Guidingstar Suna ha ka minit wa 40.
Ki yalehke mynstep ka 3 tarik toh hapyrdi ka NSA waka Sohmynting heipor 9:30 i step, ka Sabahmuswang waka Dongmihsngi heipor 11:00 waje i step wei daw pynkut da ka Royal Pole Mihmyntdu waka Ever Green Mukhla heipor 12:30 i pyrdi sngi.
