Ka MLA yong ka Congress na East Shillong, ka Dr. Mazel Ampareen Lyndoh da pynsñiaw ko yei sñiawkhia hajrong i sdang wei duna ki sngi pynman dorbar hapoh i yahkhmat ka sorkar Meghalaya Democratic Alliance (MDA), heiwa da ong wa ini i long i man daw yah ko ya ka jylla chadien.
Ka yung dorbar chna-aiñ toh ka thaw heiwa kam kiwa mihkhmat kiwa da jied da ki paidbah wow lai yatai wei wow chna ya ki aiñ neibynta i bha i biang yong kiwa chong chnong, tangwa kamwa man ha kini ki kajiak snem, da sakhi wa ki sngi wow chong dorbar yong kiwa mihkhmat da duna bha ki, khamtam nadooh u snem wa da dep neidaw i wan yong ka khlam COVID-19.
Ka Dr. Ampareen da ong ko wa kam kiwa mihkhmat kiwa da jied da ki paidbah, i bynta wa hakhmat dooh toh wa toh u leh man ko wow yatai hapoh ka yung dorbar deiwa rah ya ki phang kiwa phær neibynta i bha i biang yong ki paidbah wa ka jylla hi waroh kawi, tangwa kamwa yoo hapoh i yahkhmat yong ka sorkar MDA kawa katni, yoo la kamwa ki bru kiwa em ha ka liang synchaar tieñ ki wow yatai næ wow e jubab hajrong kiwa boon ki phang kylli kiwa da wanrah da ka Liang Pyrchah.
Da ong ko wa i e daw wa em ka khlam, da man ko iwa sñiaw lyngngoh neibhah cha kiwi won ki jylla yong ka ri ya ka yung dorbar da pynlai bait chakhmat deiwa bood ya ki kyndon wow yada.
Ka Dr. Ampareen kawa man leh ka Working President yong ka MPCC da ong ko wa hei yong sakhiat da toh wow e laad ya ki MLA kiwa man kiwa chna aiñ, wow yachem ya phyllu yumut wow sai madan ya ki phang wei wow yoh jubab na ka sorkar. Da ong ko wa ha kini ki 2 snem wa da dep, hanla wan ka khlam, cha kiwi ki jylla ka ri da yoo wa ym em itæ i pyndooh sngi ya i chong dorbar.
