U Erwin Sutnga uwa man uwi na kiwa yasaaid aiñ, da ong u wa khlem da em i yahluti na ka KHADC daw wanrah ko yei klulmar wei daw em wa pynkylla Politics ya kani ka kaam neibhah ye u jia wa daw dooh noh i kiwa e jait cha ka bei kiwa em du le tylli donhi ki jaitbru kitæ ki Khasi, Jaiñtia wa Garo kiwa man leh ki khian paaid wei kam ki Khasi wa Jaiñtia da em i du kamwa 15-16 lak ngut donhi.
Wei lada em kitu kiwa kwah wow khnioñ ya kani ka yurim ka jaitbru daw pyndooh ko yei dur ki bru yong i wei daw pyntlot ko yei bor ka KHADC wei daw wanrah ka sang ka maa ha ka chongkha chongman.
Da ong u leh wa katni em boon bha ki bru wa batai kiwa yahbakla wei emkaam wow pynbait bha nadooh i rukom e jait wei pynmih ki jait thymme wei yeini da em ka Lineage Act, 1997 kawa da batai che iyi wa chah.
Kamtæ da ong u wa u e jait pa toh kawa khlem yurim neibhah utu pa toh uwa da dep chim dei kur ka bei iwa mut lada chim dei kur yong oo da tip kam i e jait Meikha wei yeini leh da khang da ka aiñ.
Da ong u wa ki waheh kur wa na ki chong da kyrchaan ki yei lai luti ka KHADC lyngba ka Lineage Act wei khamtam wow e bor cha ki Rangbah Kur wow e Certificate Kur yow khanglaad yei mih roi ki kur wa thymme.
U Erwin da kdaw u leh wa ki kyndon yong ka Lineage Act, hapoh ka Section 12 da klam che bha wa wym chah wow e kur kulmar wot hapyrdi ki para Khasi leh, wei ka Sub-Section 7 da kdaw che wa lada em i e jait kur noh chawi, wa kynthup yei e jait pa næ jait Meikha ym ye wow pdiang.
Discussion about this post