U Montri ka chnat Transport wa PWD (Building) u Dasakhiatbha Lamare da ong u wa i duna wa da chem kamjooh i sdang kaad wei joo um ka Inter State Bus Terminus (ISBT) toh i kaam wa khian wei daw pait chwa lada emkaam wow pynman da ka takit.
U Montri da ong u ynne hadien wa wan pait ya ka ISBT ha Mawlai Mawïong, hadien wa hiar u slap wa joor heiwa da chem yei kreh habra wei i sdang kaad wei da joo um.
Hawa yaklam wa kiwa pathai khubor u Dasakhiatbha da ong u wa sñiawsih u neibhah wa da wan sakhi chwa da kiwi kiwa mihkhmat, hanlada toh wow wan chwa da oo kam u Montri ka chnat Transport wa PWD (Building).
Chooh chooh da ong u wa ha kiwon kiwon ki kaam da toh u kreh 100 na ka 100 wow myntoi ki paidbah deiwa pynrap wa ya kani ka yung da chna nadooh u snem 2017-2018 wei hadien wa dep u pynkreh da mih chooh kiwi ki kaam wa emkaam wow pynbha chooh chooh.
Hawa kylli yeiwa chem u hadien wa da wan pait, da ong u wa i duna wa chem toh iwa khian bha heiwa ki Engineer da chna pynmiat ki yeiwa joo, deiwa pynrap leh wa i kreh ha kani ka yung toh iwa da leh da PWD (Roads) ymtoh ka PWD (Building).
Hanla uni u Montri da klam u wa daw em ka takit, tangwa ynne da kylla ktien u deiwa ong, wa ya katni da biang chwa kamtu. Da ong u leh wa hawa kreh ya iwon iwon i yung ha ka sien wa nyngkong, i kreh ymjooh biang i wei ymye i wow man 100 na ka 100.
U Montri da ong u leh wa ym em iwon iwon i maa næ wow syir wow pynemkaam ya ka ISBT neibhah wa man ko kawa chngaaiñ wei u krehkaam bait ko neibhah ym em i daw bah wow pynsangeh yei kreh ko neibhah i duna toh iwa khian.
Hawa kylli won yei daw wa joo um ka ISBT, u Dasakhiat da ong u wa ka um da lang ko ha tnoon wei i joo um toh iwa narood, deiwa pynche u leh wa i bynta wa thap da u phong wa i jri, toh i rukom chna toh iwa da leh chanam katkam i rukom pynwandur khnang wow lait nei yatyngkhooh.
Hajrong i chna pynmiat ya ka tnoom ka ISBT khlem yang ya ka takit, da ong u wa da toh wow chna pynmiat noh khlem yang ya ka takit.
Hawa kylli biang wow takit neibhah wa em i pynbaad wa da kreh khalær ka Dhar Company, u Montri da pynrap u wa lada yoo emkaam daw thung ya ka takit, tangwa lym emkaam ym pynman ya ka neibhah wa daw boonkaam wei ini toh i jia iwa khian.
Hajrong i pynbaad wa chim kabu ki Taxi ya kiwa lai wa wan ha ISBT heiyatoh wa ka bai kari, u Dasakhiatbha uwa pait leh ya ka chnat Transport da ong u wa daw pait biang neibhah ym em kiwi tawon ki sahep wa toh u pait yeini.
