U Symbood Montri Rangbah ka jylla uwa pait leh ya ka chnat Kam Pohyung, u Prestone Tynsong da ong u wa ka thong yong ka sorkar toh wow kem ya kiwa chalan wa kiwa wanrah drug chapoh ka jylla.
Ka thaaiñ Khasi Jaiñtia da kylla wei da man ko kam kawi na ki thaw wa da roi bha i drugs la ha sor næ cha palatsor wei da boon kiwa da chah kdoh chah khoom hei dih ya ki jait dih pynmuaid iwa da ktah leh yaka imlang sahlang iwa da wanrah leh yei wym chngaaiñ de ki chnong ki thaw.
Hawa kylli, u Prestone da ong u wa i kaamram yong ka sorkar toh iwa eh bha katni wow yakhun kammon wow khanglaad chisiendon yei drugs wei wow kem ya kiwa khayi kiwa wanrah drug cha ka jylla, neibhah kamwa man kattæ kiwa dih hawa yoh ki dih ki yei drugs wei emkaam wow khanglaad wei kem ya kiwa wanrah.
Da ong chooh chooh wa neibynta wow yarap ya kiwa da chah kdoh chah khoom ha ini i dih, ka sorkar da wanrah ko da ka DREAM (Drug Reduction Elimination and Action Mission) deiwa ya krehlang hapyrdi ka chnat pulit waka Social Welfare neibynta wow pynlait ya ki wym ye de u ieh.
Da ong u wa neiliang ki pulit leh da leh ki yei kaamram dewa booh da ka Anti Narcotic Task Force (ANTF) yow kem ya kiwa khayi drugs.
Hawa yatoh wa i wym chngaaiñ de ka nongbah Shillong neidaw wa boon i chah tooh chah lute na ki yung bru wa ki kari wot heipor sngi leh. U Prestone da ong u wa ka sorkar da phah ki ya u SP wa u SP (City) wow leh deiwa eh ryngkat i pynboon ya ki pulit wa uiñ sonteri yow kdoh u khoom ya kam kini ki kaam wa sih yow lait nei pynwit yei chong suk chong chngaaiñ.
Da ong u leh wa i wanrah ya ka Integrated Command and Control Centre (ICCC) ha Shillong kawa pait yei krehkaam ki CCTV daw yarap ko wow kem ya kiwa leh pyrchah aiñ.
Discussion about this post