U Chief Executive Member ka KHADC, u Titosstar Well Chyne ynne ka sngi da paan pynche u na ka Syngkhong Rympei Thymmai (SRT) kawa ya saaid joor ban wow chim jait noh na u chynrang, wei wow wanrah ko yei e yumut wa kammon ka rukom kheiñ kur kheiñ jait u lai ko lada sdang wow chim yei jait na u chynrang neibhah katkam ka riti dustur u Khasi, i chim jait toh na ka kynthai.
Hawa klam ynne ka sngi, u Titosster da ong u wa ka riti dustur yong u Khasi toh wow chim yei jait yong ka bei wei ka KHADC toh ka wow pynneh ya itæ tangwa kiwa kwah wow chim jait na u kpa, toh u sñiawbha ki wow batai yei rukom kheiñ kur kheiñ kha kawa kammon.
“Da yaklam boonsien ya kani, man ko ka riti dustur u Khasi wow chim yei jait na ka bei wei wow pynneh ya itæ tangwa lada em ka rukom pyrkhat da kamwi won wow chim yei jait na u pa, nga kwah O wa kini kiwa em kam ini i thrang wow wan ki chakhmat wow batai ya i, iyi i rukom kheiñ kur kheiñ kha”, da ong u Titosstar.
Da pynrap u, “Ha u Khasi, i ong i ki kur ki kha, i kur mut i i kur yong ka bei, i kha mut i i kur yong u pa, iwa mut wa i em i leh ka dustur kawa i ngooh meikha, i burom i ya ki kha wei em i i yong i iwa kyrpang wow pynphær na kiwi won ki jaitbru”.
Hawa khut ya kiwa kwah wow chim jait na u pa, u CEM da ong u, “Nga klam che O wa lada em da kawi won ki rukom pyrkhat, sñiawbha wow e ya i yei rukom kheiñ kur kheiñ kha iwa da kammon.”
Heijooh i por da ong u wa kitu kiwa chim yei jait u pa ym ye ki wow yoh Certificate Khasi na ka Council wei ka Certificate Schedule Tribe na u Deputy Commissioner neibhah wa ka Council da dep pyntip ko yeini katkam ka Lineage Act 1997, tangwa ki Khasi kiwa chim yei jait ka bei ye ki wow yoh Schedule Tribe.
Kam wow kdaw wa ka STR da pyrchah joor ko yei wym e Certificate ka KHADC ya ki khon yong ki Khasi kiwa chim yei jait u pa neibhah wa katkam ka riti dustur u Khasi, da chim yei jait yong ka bei ymtoh na u pa.
