U CEM ka JHADC, u Thombor Shiwat da ong u wa heiyatoh wa ka bui (Report) ka CAG hei sñiawthooh yong oo toh wa em i wym che (Misunderstanding) hapyrdi ka District Council wa District Council Affairs wa ka yung krehkaam u Lat ka jylla.
Ya ini da pynche u ya ka chithi u Pravin Bakshi uwa man u Commissioner & Secretary ka yung krehkaam u Lat ka jylla ha ka 10 tarik heiwa da pyntip u wa u Lat ka jylla, u Satya Pal Malik da yoh u ya ka chithi na ka Comptroller and Auditor General (CAG) ka India ha ka 8 tarik uni u bnai heiyatoh wa i wym e ki District Council ya ki yukheiñ yudiah (Accounts) cha ka CAG da boon tylli ki snem.
U Thombor da ong u wa katkam ki dak ki chin wa da yoh, neiliang ka Council da wanrah ko ya ka CAG Report hapoh dorbar neibynta u snem 2005-06 hadooh u snem 2007-08 wei kawa dang sah wa da yoh naka CAG toh neibynta u 2008-09 hadooh u 2010-11.
Da ong u wa katkam wa jooh leh neipor nachwa chwa wow wanrah ya ka bui ha ka yung dorbar ka Council, jooh yoh ki ya ka chithi na ka DCA wa ong wa da pdiang u Lat ya ka bui wow wanrah ya ka ha ka Yung Dorbar.
Chooh chooh da ong u wa katkam wa man katni dang yang ya kani ka chithi na ka DCA tangwa phylla won wow yoo ya katu ka Wyrta wa mih ha ki sngi wa dadep (10 tarik) wa ong wa ym em u yoh yukheiñ ka CAG naka Council.
Heijooh i por da ong u wa da pynkhreh ka Council wow wanrah ya ki bui ha ka dorbar lada e bor ka DCA deiwa khlem yohbor chwa na u Lat wei lada hoi kamtæ, neiliang ka Council daw wanrah ko ya ka ha ka dorbar wow wan tangwa hawa pyrkhat ymhoi u leh kamtæ neibhah daw man ko pyrchah ya ka riti synchaar ka ri.
U CEM da ong u wa katkam wa kam ka CAG da man i iwa bakla heiwa ya ki bui yong u 2008 hadooh u 2011 dang yang hi wow e bor u Lat.
Da ong u leh wa heiyatoh wa ka yukheiñ yong man-u-snem namo ka Annual Account yong ka Council dadep pynkhreh hadooh u 2018-19 ya kawa dadep sylli bha (Audited) wei dang yang ya ka Audit Report na ka CAG wei manda yoh ya ki hap bood katkam ka aiñ deiwa yohbor na ka DCA wei ymtoh iwa eh wow wanrah ya ki ha ka dorbar.
