Jowai: Ka seiñ All Hynniewtrep People United Front (AHPUF) dap ko dei sñiawdiaw hei yatoh wa i yachruit ki para seiñbhalang ya ka dukan wa tip kam ka China Bazar.
“Heithaw wow yatylli wei wow ya ryntih para seiñbhalang wow kreh neibynta ka ri wa ka jaitbru da yaleh pathan ki kam ki syngkni kiwa yaknieh yei doh wa tung wa pyut” da ong u John Phawa uwa man kam u president ka AHPUF.
Ka seiñ da ong ko wa katkam ka yutip wa da yoh ko kani ka dukan ymtoh ka yong u tre ri nadooh wa sdang tangwa da wan kamtre u D. Laloo ya ka hadien wa lai kynreh kot ki le seiñ wa kynthup ya ka KJNU, AHPUF wa ka MPUF.
“Neitæ hadien kamwa soo bnai da lai kynreh sa ka HANM, katni won sa ka JYF wa ka JSU” da ong ka seiñ.
“Hei sakhiat ymtoh u kam u ya kani ka dukan neibhah wa oo leh em bynta u heiwow lai kynreh kot ya kani ka dukan tangwa yophylla ya i jabieñ uni u bru neibhah mar tip u wa ym em kot ko, da chet kylla won u ya kiwi ki seiñ du wow myntoi samen u” da ong chooh chooh u John uwa da ong leh wa ini pynyoo i yei mynsien arsap yong u president ka MPUF.
Da ong chooh ka seiñ wa kam uwa pawkhmat na ri-loom Jaiñtia uwa yalap wa maya wei wow kreh neibynta ka ri wa ka jaitbru tangwa manda yoo u ya ka poisa da leh u mar dei kylla.
“Yi myntoi wow khut yalang u yalang ya ki waheh chnong hei yatoh wa i chna mosque ki muslim hawa pynda oo hi wa kdung wa kær ya kini ki bru?” Da kylli ka seiñ.
Ka seiñ da pynkut ko deiwa ong wa lada toh u tre kani ka dukan toh u beh noh u ya ki baar jylla khnang wow wai laad ya kiwi ki tre ri kiwa khlem khih khlem khan.
Discussion about this post