Ka seiñ Kutumba Surakshya Parishad (KSP) kawa man ka seiñ niam kawa na Assam kawa da yaleh leh wow yoh lai ngooh Blai ki Hindu ha krem Mawjymbuiñ wa em ha Mawsynram, da pynsñiaw ko yei wym em sñiawkmen wow yoo ya ka khubor wa dawa ka KSU wow tympra ya ka Mandir wa da chna ha pchem ka yung krehkaam ka CBI wa em ha Shillong.
Ha ka kyrwoh na u President kani ka seiñ, u Satya Ranjan Borah, da beiñ u yeini i rukom leh ka KSU deilang wa kiwi de neibhah ka India toh ka ri wa yoh u mane laitlooid ya kawon kawon ka niam iwa mut wa kiwon kiwon kiwa chong chnong em hok ki wow mane kamwa kwah ki.
Da ong u wa lada em iwon iwon iwa pyrchah man ko leh pyrchah ya ka Constitution kamjooh man ko leh pyrchah ri neibhah i kam kiwa kiwa chong chnong ka India ngait i ha ka Constitution ka ri wei manda jia kam kini wanrah ko leh yei sñiaw yaphær para wa chong chnong.
Da pynkynmoo u leh yeiwa jia ha krem Mawjymbuiñ heiwa ki bor District ka East Khasi Hills leh da burom ki yei man laitlooid wow mane wei deiwa yaklam ya burom kylliang da ye wow yatylli kam kiwa chong chnong ka ri.
Chooh chooh da ong u wa ini i lai khang tala ka KSU yei thaw mane ha yung krehkaam ka CBI da pyndooh yei sñiaw chaniah ya ka sorkar Meghalaya wei da pynsuba leh hadooh katwon da burom ya ka Constitution ka ri kamjooh yei man kam ki bru.
Kamtæ da kyntu ya u Chief Minister ka Meghalaya wow chimkhia u ya ini i kaam yow lait u mih iwon iwon i kynaad neibhah waroh kiwa chong chnong ka ri toh u yoh ki ka jooh ka hok wow mane Blai lada em ki ha iwon iwon i bynta ka Meghalaya, deiwa yooluti wow sñiawthooh ki yeini wei wow leh yeiwa emkaam.
Discussion about this post