Kiwa yahkhmat ka VPP hadien wa kut ka yakhih chong kyllaiñ myngngor ynne ka sngi hakhmat Gate ka yung krehkaam ka JHADC kawa da sdang nadooh i por 10:00 waje i step hadooh 5:00 waje i janmiet, da ong ki wa kani dang toh i sdang donhi yong i yakhih wei lada ka sorkar ym ap ym sñiaw ko wow su lut ka tulop kiwa kreh ka JHADC, daw pynman yalang biang ki yow pynkhreh da ka rai yakhih wa rap khor chakhmat.
Neitæ heiyatoh wa i khang tala ka JHADC ya ka Gate, u Damewanhi Rymbai, Organising Secretary ka VPP East Jaiñtia Hills District, uwa man leh u dkhot ka State Executive Committee ka VPP ong u, ini pynyoo wa kiwa kreh ka JHADC nadooh u khliehdooh yong ka u CEM leh ya ksohkti lang ki wa kani ka yakhih yong ki, neibhah wot kiwa kreh ka Council leh boon wym yohlaad de ki u psiah chapoh neidaw wa khang tala.
Kam wow pynkynmoo wa ynne ki dkhot ka VPP da mut ki wow pynman yakhih deiwa chong kyllaiñ myngngor ha pchem ka JHADC tangwa ym em yoh ki neidaw wa da khang ya ka Gate hadooh wa kiwa kreh ka Council leh ym yoh ki u psiah chapoh wei da hap chong ki cha rood sarok hadooh wa kut i por kreh.
Discussion about this post