Ka National People’s Party (NPP) da e jubab ko yei kular wa da khlai da ka Chairperson ka AITC, ka Mamata Banerjee ha ka yalang Election ha North Garo Hills ha 18 tarik uni u bnai deiwa ong wa kini toh du ki kular Election kawa sñiaw biang du hei thoh wa hei mih khubor.
Da ong wa kini toh ki Card sah ram namo ki Baaki Card- ka ‘WE Card’ waka ‘MYE’ wei kini ki Card heithaw wow wanrah ki yei kylla daw pynhaap ki ya ka jylla hei dap ram kamwa da jia ha West Bengal.
Da kdaw leh wa ka WE Card Scheme toh kawa pynkylla pyrtuid na ka Scheme Lakshmir Bhandar yong ka sorkar West Bengal. Ka sorkar AITC ka West Bengal da kit ram ko hadooh T. 59,000 chi khlieh bru (Per Capita Debt) ha u snem 2022-2023 wei kani ka Scheme toh kawi na ki daw wa nang ku ka kit ram.
Ka NPP da ong ko wa iwa sñiawphylla chooh chooh wa ka sorkar Bengal da hap su ram ko haduh T. 80,000-T. 90,000 klur ryngkat ka sut ha kiwa paan ram man-u-snem. Manla kiwa chong chnong ka Bengal daw hap ki wow su ya ka ram wa poi T. 8000 man-u-snem.
Ka NPP da kyntu ko ya ki paaid wa chong chnong ka jylla wym toh u ngop ki hei kular ka All India Trinamool Congress (AITC). Ka NPP da lai ko ha ka thong (Mission) wow yahkhmat ya ka jylla wei kwah ki ya kiwa chong chnong ka jylla wym toh wow chah pynbiej ha kam kini ki kular.
Chooh chooh da kdaw wa ka ram wa nang kynton yong ka West Bengal neibynta u snem 2022-2023, daw ku ko cha ka T. 5.86 lak klur naka T. 5.28 lak klur kat hadooh ka 31 tarik Wisu (Mar), 2022. Ka sorkar West Bengal da ya ksaaid ko katni hei duna poisa wei chem chitom ki wow pynkrehkaam leh ya ki Social Welfare Scheme wei kani ka Scheme (Lakshmir Bhandar) da nang ktah ko ya kiwi kiwi ki Scheme leh.
Kamtæ da ong wa kat ini i kit ram, da yoo che wa ka AITC daw pynman ko leh ya ka Meghalaya wow ngat lang ha ka ram wei daw ieh ya ki bru wow maad ki yei tynjooh.
Ka NPP da ong ko wa ym e laad ko ya ka AITC wow pynbiej ya ki paidbah da kini ki kular thok wei daw thaad madan ya ki katwa em ki.
Chooh chooh da ong wa ym che wa neiwon ka AITC u wanrah ko ya ka poisa wow pynkrehkaam ya kani ka Scheme lane u rah ko ya ka poisa ka Meghalaya cha West Bengal.
I rukom pynpsiah pyrtuid ha kani ka Scheme ka AITC leh toh deiwa boon i duna wei ka I-PAC kam ka Agent da phet ki kylleiñ kylleiñ ki thaw ka jylla wow pynpsiah pyrtuid ya ki bru, lyngba ki kor Software (Automated Bots), i pynpsiah pyrtuid toh du wow pynheh. Kini ki Scheme daw poi ki i pynlut hadooh T. 2000 klur naka muna tangka, iwa man 5% na ka mang pynlut ka jylla, kawa daw yah chei kyrdooh poisa ha ki kaam pynroi, i saam marbaam wa i su tulop ya kiwa kreh sorkar.
Katni ka AITC da kwah ko wow dai cha ki bru dei yimphoo cha kiwa chong chnong ka jylla hawa uwa yahkhmat yong ki u Dr. Mukul Sangma wym ye u wow leh iyi iyi leh heipor wa man u kam u Montri Rangbah.
Ka NPP da ong ko leh wa ka West Bengal toh kawa wan hei wa ar hei em boon dooh ki kynthai kiwa dang thooh kreh katkam ka bui (Report) ka Employment Exchange 2020 deiwa em 24.6 lak ngut. Katkam ka bui ka Employment Exchange, da em boon dooh kiwa thooh kreh ha ka Live Register hapyrdi u snem 2019 wei kini toh ha West Bengal kiwa em 77.6 lak ngut.
Ka NPP da kdaw ko wa ka sorkar wa yahkhmat ka NPP da wanrah ko ya ki kaam pynroi kiwa da paaw ha ka jylla, da wanrah ya ki Policy wa ki Programme wow nang yahkhmat ya ka jylla Meghalaya cha i ku chaphrang.
Ka NPP ha kini ki san snem da pynyoo ko yei krehkaam kiwa paaw bha deiwa wanrah ya ka FOCUS wa FOCUS+ kawa yarap ya ki warep. Kini ki Scheme da krehkaam ki ha ki chnong ki thaw wa ki paidbah warep kiwa da poi palat 4.5 lak ngut kiwa da yoh myntoi na ki.
Ka NPP da ong ko leh wa ki manyung yong ki warep da yoh ki ya ka song poisa wa T. 10,000 na kini ki Scheme. I pynkupbor ya ki khynroo lynba ka Youth Empowerment through Youth Empowered Organization (YESS) Meghalaya kawa toh neibynta ki khynroo hawa ka sorkar da e ko ya ka song poisa yarap wa T. 1 lak cha ki seiñ yong ki khynroo yow kyntu yei im yong ki.
