I kyrpaad na u J. Treilang Suchiang, UDP Candidate 3-Raliang Constituency

Nga u J. Treilang Suchiang, u khon yong ka Smt. Noni Suchiang wa u (L) Shri. Jendrowell Sungoh uwa chong wa sah ha Shangpung kamjooh uwa man kam u MDC yong ka 16-Shangpung JHADC Constituency, e khublei Christmas kamjooh Advance New Year wa suk wa kmen ya phi waroh yow yoh phi yei chait i nang waka kamai kajih kawa biang. Heijooh i por chim O ya kani ka laad wow kyrpaad kyrpon ya phi ki paidbah ki khon ka 3-Raliang Assembly Constituency kynthai wa chynrang, ki manbei manpa, khynnah waheh wow e phi ka kyrchaan pura wow pynjop ya nga ha kani ka Election wow wan ha u snem 2023. Ka Core Committee yong ka UDP da yoo bit yoo biang ko ya nga wow man kam u kyrtong yong ka na ka 3-Raliang Assembly Constituency ha kani ka Election 2023.

Nga pynsñiaw O ha phi yei thrang wei angnood nadooh mynsien u embynta haka imlang sahlang, ha ka yap ka im, ha ka synchaar khadar, nga da jooh man O kam u Waheh Chnong ka Shangpung Pohchnong, nga da pyrchang O u lehbha kam u Waheh Chnong tangwa wym kot bor O u lehbha yei emkaam ha chnong ha thaw, da pynjop leh ya nga kam u MDC ha u 2019 tangwa wym kot i bor wow lehbha du hei bor MDC wow e yarap ha waroh ki liang ya kiwa dooh wa duk ya ka Constituency hi waroh kawi, neite i daw nga him O ya kani ka rai wow yaleh ya kani ka Election MLA naka 3-Raliang Constituency. Nga yieñ yaleh O ya kani ka Election wym toh deiwa em wa pynbor ya nga, toh dei mynsien angnood i yong nga samen kamwa da kdaw haneiñ wow chakri rap bha ya ka imlang ka sahlang ha waroh ki liang. Nga him O ya kani ka laad u kyrpaad ya phi ki lok ki jor, ki kha ki man, ki kur ki jait, ki payu para, ki chnong ki thaw, ki wah yung ki neiñ yung, ki lok ki jor wa na baar Constituency leh kamjooh u e phi ya nga ka kti timun tidiang u pynjop ya nga ha kani ka kynti.

Kamwa da tip da bna phi nga man O u khon wa dooh wa duk, wym em poisa tangka O kat da kamtæ khutlang ya ki lok ki jor yong phi deiwa ong mylliñ ka ka 10-20 hajar tangka lym kamtæ ka Election da kut poisa da lut chirta duk phi u sahnood, kamtæ nga khut O ya phi dei mynsien wa maya u e phi ya nga yei kyrchaan wa pura lada nga poi O cha ka thong yong nga. U chakri hok O, u kreh chitom u wanrah ya ka roi ka paar, u ya krehlang yei miat i bha wei wow kuplang yaka yap ka im, ka yoh ka kot, ka roi ka paar hapoh ka Constituency, District, State wa ka Ri hi waroh kawi.

Heiyatoh wa kam kani ka por kawa tbian wym chah ya nga, nga paan maap O na phi kat wym ye O u yachem uwi pa uwi, kawi paka wa manyung ki thlu yung, dei mynsien wa sñiawkhia nga kyrpaad O ya phi u kyrchaan pura u pynjop ya nga ha kani ka kynti. U Blai u emlang u wa phi ha waroh i liang.