U Chief Executive Member (CEM) ka Khasi Hills Autonomous District Council, u Titosstarwell Chyne da pynsñiaw u yei wym yahaap ya i mih chah thngan ki ar ngut chi kurim hajrong i chah dat ki kattu katni kiwa chong chnong ki wymtoh ki Khasi ha ka 20 tarik uni u bnai.
Ynnin ka sngi, ki kattu katni ngut ki baar jylla hapoh i yahkhmat u S.K. Choudhury wa ka kurim yong oo, ka Kalpana Choudhury da lai chong chah thngan ki hakhmat ka khyrdop warim ka Assembly wow pynsñiaw yei sñiawkhia hajrong i chah dat ki le ngut, wei i chah thombor ki bru kiwa ymtoh na ka jaitbru Khasi hapoh ka jylla.
Hajrong ini, neiliang u Titos da ong u wow chah thngan neidaw wa chah dat ki wym toh ki Khasi namo ki dkhar, ini i leh yong ki daw wanrah pathan ko yei sñiaw yaphær jaitbru, wei da ong u wa lada man kamni, ki Khasi leh u chah thngan noh ki hajrong i chah pynyap yong ki khynroo Khasi dang ini wadep ha Them Bejoy, ha Golflink, Ichamati wa kamtæ ter-ter.
Da ong u wa kam kiwa chong chnong ymtoh iwa sñiawsuk wei ym pdiang ya kiwon kiwon ki kaam pyrchah aiñ wow dat wow tynyap ya kiwi ki bru, tangwa ha ka imlang sahlang jooh em bait kam ini i jia, tangwa ymtoh du ya kawi ka jaitbru tangwa wot ki Khasi leh chah dat chah tynyap ki.
U CEM uwa man leh u Working President ka UDP da ong u wa lada em kam ini i lehbor ya ki bru wa lui-lui, waroh toh u beiñ ki, tangwa emkaam leh wow thooh ya i daw wa chah dat wei jia kam ini, boi leh heh ki næ klam khlem akor ki, wei ym mut wa lada chah dat u Khasi u pynbaad bait wa dat ki dkhar næ ki wym toh ki Khasi.
Heijooh i por u Titos da ong u wa ini i sdang kini ki bru wow chah thngan daw yah ko cheiwa bakla wei toh u sangeh hi noh ki chisyndon, wei lada em iwon iwon da em ki pulit wa ka aiñ wei elaad ya ka aiñ wow leh yeiwa emkaam.
