Hajrong ka thong u pynsñiawthooh yei maa i pynemkaam drugs iwa da poor smat haka imlang sahlang wei kamjooh u pynsñiawthooh yaki kaam wa man pyrchah aiñ wa yatoh wa ki kynthai wa ki manbei, ynne ka sngi ka All Jaiñtia Muster Roll Workers & Labour Union CEC da pynman ko yaka Awareness Programme ha Auditorium ka District Library Jowai deiwa wan chimbynta da kiwa kreh Muster Roll na kylleiñ ka Ri-loom Jaiñtia.
Ha kani ka yalang pynsñiawthooh da yoh i batai pynche naka Lucy Ksoo, Manager ka One Stop Centre Sabahmuswang wa naka Dr. J.N.Shullai, Director MCSWA.
Ka Lucy Ksoo hawa e yei klam hajrong ka phang “Crime Against Women” ong ko i chah lehbeiñ ki manbei, ki kynthai ye ki u jia hapoh yung ha thaw khih thaw kreh næ haka imlang sahlang.
Wei ki jait thombor wa pyrchah aiñ kynthup i choh i dat dei kti næ da ki tiar ki tar, i thmu leh yabor khlem i ngait i mon ka kynthai hanla toh kiwa chi kurim leh, i rukom leh rukom klam wa ktah yei thij i pyrkhat wa kynthup i klam da ki kyntien tynrooh tyndung kamjooh leh i pynemkaam ki kyntien sih ha yung ha sem næ ya kiwi.
Hawa khana yaki kyndon aiñ waphær waphær wa ye u pynchitom ya kiwa leh pyrchah, pyntip ko leh wa kiwa leh yei kaam pyrchah aiñ ye u man ki kynthai næ chynrang.
Kamtæ yow lait na kam kini ki jait thombor kyntu ko yaki kynthai ki manbei u mih ujor, wym hoi u kheiñstiñ næ suki khnang yow lait u nang joor.
Heijooh i por kyntu ko yaki chynrang wow man kiwa syndong i rukom klam rukom leh, wei ki khynthai leh wymtoh u chim kabu ware ki.
Neitæ yow yoh ki laad yarap kyntu ko yaki paidbah u pyntip næ wan mih cha ka One Stop Centre wa em ha Sabhamuswang, West Jaiñtia Hills District.
Hajrong ka phang “Drugs Abuse” næ i ngop hei dih drugs iwa da ktah yaki bru wa dih kamjooh yaka yung ka sem waka imlang sahlang da yoh i batai pynche naka Dr. J.N.Shullai.
Hawa klam pynsñiaw ko leh i diaw neidaw wa ka West Jaiñtia Hills District toh kam kawi na kiwa joor ki bru wa ngop hei drugs wa kamjooh kiwa yoh yei kjut HIV/AIDS.
Ong ko man i kthang wa khroo yaki bei ki pa wa yoh ya ki khon wa dih drugs neibhah hap ki u maad boon i jynjar.
Kamtæ kyntu ko wym hoi hi wot tang u maad leh neibhah lada maad da saja u yait nei chah kdoh chah khoom hei drugs.
Ha kani ka yalang da yoh leh i klam na u Adviser ka All Jaiñtia Muster Roll Workers & Labour Union CEC, u K.L.Pariat, naka D. Iakai, President ka All Jaiñtia Muster Roll Workers & Labour Union, na u D. Khonglah Asst. General Secretary Education Unit wa kiwi haka yalang wa pynlai da u A.R.Laloo, Asst. General Secretary ka All Jaiñtia Muster Roll Workers & Labour Union.
Discussion about this post