Ka chnat Puræ Puthi ka jylla hapoh i yahkhmat u Rakkam A Sangma, hynne ka sngi da chong ya phyllu yumut ki wa ki Principal yong ki skur waphær waphær hajrong ki lynnong kot namo ka Curriculum, ki kot puræ wa Syllabus wa pynemkaam ha ki skur hapoh ka jylla.
U Rakkam da khana u wa ha ini i yachem da em i e buit wow pynman Compulsory biang ya ka Subject Mathematics neibhah kamwa man katni ka rukom wa pynkrehkaam ka Meghalaya Board of School Education (MBOSE) da man deiwa e u jied yow Pass næ katæ ka ‘Best of Five’, heiwa kamwa 90% ki khynnah ym bien ki wow chim ya ka Mathematics.
Ha kani ka yachem lang, da chimbynta kamwa 40 ngut ki Principal na ki Secondary wa Higher Secondary School kiwa em ha ka jylla kiwa pynemkaam ya ki Syllabus ka Meghalaya Board of School Education (MBOSE).
U Montri da pyntip u wa da em kiwa e yumut wow pynkylla leh ya ki kot puræ neibhah wa em kiwa jrong hi-eh, wei da em leh i yaklam wa em ki kattu katni ki skur ki wym pynemkaam ya ki Syllabus ka Meghalaya Board of School Education (MBOSE).
Heijooh i por da khana wa ka Directorate of Educational Research and Training (DERT) daw pait bniah ko ya ki kot puræ wei daw thooh bniah leh yeiwa duna, iwa biang wa kiwi de kiwa emkaam wow pynbait, wei daw e kti won yeiwa chem cha ka sorkar yow bichaar chwa wow e yei rai wa khaddooh.
Discussion about this post