U MLA ka Congress uwa man leh kam uwa yahkhmat ka Liang Pyrchah hapoh ka yung dorbar chna aiñ ka jylla, u Ronnie V Lyngdoh da ong u wa i mih ki napoh ka dorbar ymtoh wa pyrchah yaka mang tangka, tangwa neidaw wa khlem bood kyndon pynlai dorbar.
Hawa klam wa ki kattu katni ngut kiwa thoh khubor, u Ronnie da ong wa u da pdiang yei pyntikna ki wym jia de kamni hadien hadood, ki MLA ka Liang Pyrchah da hun ki, tangwa hawa yei sur wa i pynsñiaw ka Liang Pyrchah da chah yooh roit noh, ym em de da kawi ka luti lait noh wow mih bait noh napoh ka dorbar.
U Ronnie da ong u leh wa man iwa emkaam wow bood ya ki kyndon wei wow pynlai yaka dorbar katkam ki kyndon wei neiliang yong ki MLA ka Liang Pyrchah da kdaw ki yei bakla tangwa ym em ap ki.
Ki MLA ka Liang Pyrchah wa kynthup na ka Congress, VPP wa TMC ynnin ka sngi kut yong ka dorbar mang tangka da mih ki pui napoh ka yung dorbar hachwa wa u Montri Rangbah ka jylla yoh u wow e yei jubab yei yatai hajrong ka mang tangka wa ka sorkar da wanrah ko.
Da chrai ki leh yeiwa ong u Lamphang wa pynlut ki yei por deiwa wanrah ya ki ‘Point of Order’ tangwa hadien u Lamphang da mynjur u wow pyndam noh yeini wa ong u wa pynlut ki yei por.
Sa iwi i daw wa mih noh waroh ki MLA ka Liang Pyrchah toh hadien wa u MLA ka Congress na Umsning, u Dr. Celestine Lyngdoh da pynsñiaw u yei wym sñiaw yahaap wa hachwa wa u Montri Rangbah u jubab yei yatai harong ka mang tangka, da wanrah chwa ya ka ‘Demand for Grants’, neibhah katkam wa ong u MLA ya ka ‘Demand for Grants’ da dep wow booh ha ka 23 tarik ka tayaaw wa da dep tangwa da pynche wa iwa da leh haka 23 tarik toh ki Supplementary Demands.
Discussion about this post