December 9, 2021
“Ka kabu katni toh ya ki krytong wa em ha ka sorkar MDA neibhah hadooh katni la kamwa le snem chiteiñ ki Party da man ki kiwa yatylli katwa ka liang pyrchah won ym em u yatylli ki hanla em ki ha ka liang pyrchah,” da ong u Montri ka sorkar jylla uwa man leh u MLA ka UDP na Amlarem.
Ya ini waroh da ong uni u heiyatoh wa i piah ka seiñ Congress hapoh ka jylla heiwa 12 ngut na ki 17 ngut da mih ki wow psiah cha ka seiñ AITC deiwa pynrap wa ini pynman i ya ki paidbah wow e biang ki yei kyrchaan ya ki MLA wa em hapoh ka sorkar MDA.
Chooh chooh da ong u wa ka Election ha Meghalaya ymtoh wow kheiñstiñ ya ka neibhah emkaam wow chimkhia hadooh wa thap ya ka Vote wa khaddooh.
U Lahkmen da ong u leh wa i ktah nei mih ki seiñ thymme daw tip du hadien wa lai ki cha ki paidbah.
Da ngait skem u leh wa ka UDP daw ye ko wow pynboon ya ki MLA yong ka ha ki snem wow wan wei chong leh ha ki MLA kiwa kammon wei kammon da kreh ki ha ki thaw yong ki.
