U Montri Rangbah ka jylla, u Conrad K. Sangma da ong u wa toh i kaamram kiwa chong chnong ka jylla wa ki MLA wa da jied ki paidbah wow rai yei yi u neh næ ksoh namo wow em ha ka sorkar.
Ya ini u Conrad da ong u hawa jubab yeiwa pynbaad uwa yahkhmat ka liang pyrchah, u Dr. Mukul Sangma uwa da ong wa ya i eh na ka Load Shedding ye wow pyndam du hadien wa beh noh ya u Conrad uwa man u Montri Rangbah wa ya u James Sangma uwa man u Montri ka chnat bordiñ na i thaw wa em ki katni.
U Conrad da phylla u ya i klam u heh ka Congress, deiwa ong leh wa ha i synchaar paidbah toh i kaamram ki paidbah wow rai. Da ong u leh wa ha i synchaar paidbah u Dr. Mukul leh em u i hok wow klam katkam wa sñiawthooh u samen.
Ha iwi i liang da ong u wa i eh ha ka Load Shedding ka MeECL toh na ki por nachwa, wei da toh u pait bniah leh kammon ka yakular krehkaam wa ka NTPC da wanrah ko ya i eh kamwa man katni.
U Conrad da kdaw u leh wa ki sorkar wa da lai kiwa boon emktilang ki ha ini i eh wa wan katni, tangwa da kyntait won u wow pynbaad deiwa ong wa haap bichaar leh yeiwa da dep.
