U Montri Rangbah ka jylla, u Conrad K Sangma da ong u wa ka sorkar em ko ya ka Monitoring Committee wa da khlieh da u Additional Chief Secretary heiyatoh wa i pynkreh ya ki kreh ka sorkar, wei ka Committee jooh pyntip ko yeiwa chem ko neipor cheipor.
Ya ini da ong u Conrad hajrong i pynbaad u heh ka Liang Pyrchah, u Dr. Mukul Sangma wow em ka Independent Quality Monitoring Team wow pait ya i kreh ka sorkar.
Heiyatoh wa i oor i khlieh tnoom ka yung dorbar chna aiñ wa thymme, da ong u wa ini toh i wym poi pyrkhat neibhah neiliang ka sorkar da kreh chitom ko wow pyndep noh ya i kreh.
Da ong u wa katni chong i hei takit lada ye wow lait na kam ini i jia, neibhah wa man i jia i wym poipyrkhat. Da ong u wa hap sñiawthooh leh ya ki stat chna yung (Technicality), wa ini i kaam toh iwa khia bha khamtam heiyatoh wa i tnoom, neibhah ympu em kiwa da pyrchang ya kam ini ha ka thaaiñ wei man iwa eh.
Da ong u wa hajrong ini emkaam leh wow sñiawthooh neibhah i kreh ymtoh iwa suk, wei lada iwa ye wow pynyieñ kamwa da thmu daw man i kreh wow sahnaam (Iconic Structure).
Hajrong i em dak sih ki karkhana wa kynthup ya ka M/S Design Associates wa ka Rajkiya Nirman Nigam Ltd, u Montri Rangbah da ong u wa ymtip u iwon iwon hajrong ini, deiwa pynrap wa ki takit ye ki wow lai chaphrang wei lada chem wa da chah pynbaad lane chah rai pynrem ki da emkaam wow chimkhia.
Da ong u wa daw thooh yutip u hajrong ini i chah pynbaad, deiwa pynrap wa du wow pynbaad katwa dang lai ka takit daw man iwa bakla.
