U MDC ka Congress na Mawkyrwat, u Carnes Sohshang da ong u wa ka sorkar da toh u pynkyllooid ko ya ki rukom pynrkhiñ hawa yatoh neibynta ki khynroo khyllood kiwa lai phet yaleh kreh pulit kawa da lai chakhmat katni ha ka jylla.
U MDC da ong ya ini hawa pynsñiaw yei eh kiwa yaleh phet ya ka PET hawa yaleh kreh pulit neibhah katkam ki kyndon wa da booh, hap ki u pyndep yei yoh tika yada COVID-19 lane hap ki wow wanrah ya ki RT-PCR Certificate wow pyntikna wym em chah ktah ha u COVID-19.
Hajrong ini neiliang u Montri Rangbah ka jylla, u Conrad K Sangma da dep u wow klam wa i pynrkhiñ ya ki kyndon toh neibynta i chngaaiñ kiwa boon, heiwa da ong u wa daw pait bniah leh ya ki kyndon wa da booh da ka Central Recruitment Board hawa yatoh wa i yaleh kreh pulit.
Hawa kylli, u Carnes da ong u wa ki kyndon næ SOP wa da booh da ka sorkar da pyndoohnong ko ya ki khynroo khyllood wa thooh kreh khamtam na ki thaaiñ palatsor, neibhah kamwa da yoo ynnin ka sngi yei yi u chngaaiñ hawa da ki phaw hajar ngut ki paidbah da yalang ki ha Mairang heipor wa wai yaka District.
