Ka sorkar jylla da pynbna ko wa ya ki khynnah Class 9 hadooh Class 12, wa kamjooh leh ki College u sdang noh ki u wai nadooh mynstep ka 1 tarik Naikhynde, heiwa ka sorkar da pynmih ko leh ya ki kyndon (SOP) wow yada ya ki khynnah na i maa heiyatoh wa u khñiang khlam COVID-19.
Hawa yaklam wa u montri ka chnat puræ puthi ka jylla, u Lahkmen Rymbui da ong u wa hanla ka sorkar da phah ko wow sdang noh ya ki skur nadooh mynstep tangwa iwa emkaam dooh toh i sñiaw biang ki bei ki pa wow phah ya ki khon yong ki wei heijooh i por da ong u wa ki School Managing Committee (SMC) toh u pait ki lada em i maa wei ymtoh u ktah i ya ki khynnah.
Da ong u leh wa ymye u ong næ kyntait wa ym mih iwon iwon i eh i khoo tangwa i rai ka sorkar toh neibynta i myntoi ki khynnah wow chah hikai ki neibynta i myntoi yong ki wei emkaam leh u pait ya i chait i khiah ki khynnah.
Chooh chooh da ong u leh wa boon na ki manbei manpa wa kiwa sikai kmen ki ya i rai ka sorkar wow wai skur noh neibhah wa ki khynnah da chah ktah bha ki na i khang ya ki thaw puræ la kamwa chi snem chiteiñ kattu wei wa ki Online Class leh ymbiang ware ki neibynta waroh wei ki khynnah leh emkaam ki yei chah hikai wa rap paka.
Ha iwi i liang won, u Lahkmen da ong u wa katkam ka yukheiñ wa da yoh da ka chnat, da em kamwa 75% na kiwa sikai kiwa da chim tika, wei da pynsñiaw u leh yei emkaam wa kiwi leh u chim tika ki næ u wanrah ki ya ka Negative RT-PCR manla ka 10 sngi.
