U Montri Rangbah ka jylla, u Conrad K Sangma da ong u wa i klam yong u Amit Shah toh du i klam yalap Election neibhah toh i iwa jooh klam ka BJP ha man ki Election ha kiwi ki jylla leh.
Kam wow pynkynmoo wa uwa yahkhmat ka BJP uwa man leh u Montri ka chnat Kaam Pohyung ka ri, u Amit Shah, ha 16 tarik uni u bnai ha ka yalang paidbah ha Tura da kynthah u deiwa khor ya ka National People’s Party (NPP) wa yahkhmat da u Conrad Sangma, deiwa ong u leh wa ka jylla Meghalaya toh kawa nyngkong dooh hei baamtooh na ki jylla hapoh ka ri India.
“Kam ini i klam da kiwa yahkhmat ka BJP da jooh sñiaw ha man ki yalap Election ha kiwi ki jylla leh, kam ha West Bengal, Telengana, Delhi lane ha kiwon kiwon ki jylla wa ka BJP em ko ha ka liang pyrchah,” da ong u Conrad uwa man leh u National President ka NPP.
U Montri Rangbah da ong u wa ka BJP ha Meghalaya da emlang ko waroh san snem ha ka sorkar wei da ya krehlang ko wa ka NPP, wei kam kini ki pynbaad toh du ha ki por Election.
“Nga ym em O iyi iyi wow ong hajrong ini i pynbaad ka BJP, neibhah ki da ya krehlang ki wa i,” da ong chooh chooh u.
Hawa yatoh wa i maham ka BJP wow phah takit ya ki kaam baamtooh ha Meghalaya da u Judge wa da chong ngiah ka Supreme Court, u khliehdooh ka NPP da ong u wa ym sñiaw iyi iyi neibhah toh ka kular wa da booh ki ha kani ka Election wow leh.
Hawa kylli yei long i man ka NPP hei yabeh wow poi cha ka thong, da ong u wa ka NPP daw poi bait ko chei jop wei daw yoh u synchaar samen.
Hajrong i kulmar wei yachoh neidaw yong ka Election ha Garo Hills, u Conrad da ong u wa i pynbaad wa ki kulmar wa pynmih da ka NPP toh iwa bakla, neibhah wa ka Party ka ngait ko ya ka Election kawa jai-jai wei kawa suk wa saaiñ, wei ye u man wa iwa jia toh na kiwi ki daw kiwa da em chwa ha kitu ki thaw.
