I yatai hajrong ka phang wa yatoh wa i pynbait pood hapoh ka yung dorbar ka Khasi Hills Autonomous District Council (KHADC) ynne ka sngi da man ko kawa chit bha khamtam hajrong i pynyoo nia mar kylliang hapyrdi u MDC ka Mawhati wa u MDC ka Rambrai Jyrngam.
Hajrong kani ka phang yatai wa da wanrah da u MDC ka Congress na Nongstoiñ u Gabriel Wahlang lyngba ka Motion da sakhi wa da em i yaphær yumut wot hapyrdi ki MDC ka Liang Synchaar heiwa uwi da da yaroh u yei ye ka sorkar wow pynbait pood katwa uwi won da ong u wa hap wow husiar nei kaam wa dei rai jhan.
Neiliang u MDC ka NPP na Rambrai Jyrngam u Bajop Pyngrope hawa ya chimbynta ha kani ka yatai hajrong i kaam pynbait pod hapyrdi ka Meghalaya wa Assam, da e u yei yaroh ya ka sorkar Meghalaya kawa katni wa hadien 50 snem i lai luti ka jylla da ye ko wow pyndooh noh yei eh neibynta ka pateiñ wa daw wan.
“50 tylli ki snem da lai, ka sorkar Congress ha kitu ki por hanla da synchaar ha Delhi, ha Assam wa Meghalaya tangwa ym ye ko wow leh iyi iyi leh wei toh kani ka sorkar kawa da ye wow pynbait ya u pood u ang,” da ong u Bajop.
U Bajop da ong u wa kam ki MDC ym em ki yei pyrchah lane i eh wow ujor mukotduma da ki Hima wei ka rai kawa da chim kam ka Council leh man ki wa ki Hima daw lai ki wow ujor mukotduma, ym wow lai da ka Council, neibhah wa toh ki Hima kiwa kam wa ki em ki ki kot ki sla deiwa ong leh wa oo kyrchaan pura u ya ka soskular MoU neibhah wa waroh da kwah ki wow pynbait noh ya u pood.
Neilaing won u MDC ka Congress na Mylliem u Ronnie V Lyngdoh da ong u wa i klam ki MDC khynroo hajrong kani ka phang man ko kawa chit, wei sñiawsuk u lada toh ki klam neibynta ka jaitbru tangwa lada toh neibynta ka seiñ te ym tip u pu cheiwon ini i kaam.
Kamtæ da kylli u wa hawa pyndam yei eh yong ki pateiñ lyngba ini i pynbait pood, katwon tylli ki thaw da e cha Assam wa katwon u sah ha Meghalaya. Wei da ong u yeini i pynbait ye wow leh 50 snem nachwa tangwa da yieñ skem wym e chi inchi leh yei thaw.
Neiliang u MDC wa dei thung, u Bindo M Lanong da ong u wa toh u husiar bha deiwa ong wa kitu kiwa chong ha ki thaw kiwa khappood waka Assam, da dooh ki yei mantre yei khyndaw u chyiap neibhah katkam ka Assam Land Regulation Act, 1986 waroh ki thaw ka Assam toh ki yong ka sorkar.
Da ong u leh wa ka thaaiñ Ratacherra kawa ym jooh em kam da ka Assam mynnu mynnu kawa em ha u pood ka Jaiñtia Hills wa pynyakhlaad wa ka Assam lyngba ka wah Malidor, katni ka Assam da sdang ko wow kam yow kam kam ka thaw wa ya kajia pood. Wei hajrong ini, ka sorkar ym toh de wow rai jhan ko.
Neiliang u Charles Marngar hawa klam chwa ha kani ka yatai, da ong u wa toh ka bynta wa da yatai boonsien hapoh ka dorbar, wot ha ka dorbar wa dang dep leh wei da iwi i sur da rai wow lai bait chakhmat ka yung bichaar.
Da ong u wa i mynjur lang yong waroh, da phah ya ki Hima wow pynbiang ya ki kot ki sla, tangwa sñiawsih won wa hapyrdi i pynbait ka Council wa ki Hima du hadien chi sngi wa da dep rai da iwi i sur, ki 11 ngut ki paralok MDC na ka NPP da ong ki wa kyrchaan pura ya ka rai ka sorkar.
Uni u MDC ka Mawhati da ong u wow kyrchaan ya iyi wa leh da ki ar tylli ki sorkar jylla man ko iwa maa, ka sorkar Meghalaya wa sorkar Assam yaphær ki, heiwa ha Assam ym ye wow mantre yei khyndaw yow chyiap.
