Ynne ka sngi ka All Jaiñtia Muster Roll Workers & Labours Union chirup waka Union Cook Cum Helpers PM Poshan, Meghalaya da pynman ko ya 8th Annual General Meeting wa i pynkup burom ya u Montri Rangbah ka jylla, u Conrad K. Sangma kam u kongsan hei emlang u Symbood Montri Rangbah, u Sniawbhalang Dhar ha ka yalang wa da pynman ha Madan Kawang, Ummulong.
U KL Pariat uwa man uwa e buit ya kini ki seiñ hawa e yei klam da ong u wa ynne i dap 8 snem wa sdang ya ka Muster Roll and Labour Union deiwa ong wa ha kini ki por da em hapoh i yahkhmat u Conrad Sangma kam u Montri Rangbah ka jylla.
Da ong u wa em chiboon ki khon yong kiwa kreh wa em hapoh ka seiñ kiwa chem chitom wow lai puræ ki chaphrang nadooh kiwa dadep HSSLC wa kiwi kiwi.
Da kyntu u leh wow e bhah 10% na ka Reservation neibynta i thung kreh wa i lai puræ ki khon kiwa duna hei yoh i laa khamtam kiwa khih mylla.
Kamjooh leh da kyntu ya u Montri Rangbah wow yada ya ki um ki wah wa em ha Ri-loom Jaiñtia kam ka Myntdu, Mynngot, Myntang wa ka Kupli.
U Sniawbhalang Dhar da ong u wa ha u 2018 hawa chong yalang ki Montri sorkar da ong u wa u Montri Rangbah mar sdang da rai u wow yoh tulop kiwa kreh Muster Roll man-u-bnai.
Chooh chooh da pynsñiaw u ya i kaam pynbait pood wa da rai u Conrad wow lai chaphrang wei ynnin oo deilang wa ki MLA ka Ri-loom Jaiñtia da hiar ki cha Khanduli wow pynbait ya i kaam khappood.
U Conrad hawa e yei klam da e khublei u ya ka seiñ wa da kynjoh ko 8 snem kattu wei da ong u khlem kynjoh ktien na ka seiñ tangwa du lyngba ka Phone da pdiang u wow wan chimbynta ha kani ka yalang.
Chooh chooh da ong u wa ynnin u snem da khut ya oo tangwa ym em u wan u neidaw wa daw ong ki bru wa wan u du neibynta ka Election.
Da kynmoo u wa ha u 2018 ympoi pyrkhat u wow man kam u Montri Rangbah wei iwa nyngkong pynpyrkhat i ya oo wa ini toh i mon u Blai.
U Conrad da ong u wa ha ki san snem wa da lai da mih ki tynjooh wa har rukom wei khamtam u pood uwa dang sahteiñ la 50 snem wow pynbait hadooh katni.
Chooh chooh u Conrad da ong u wa ha u 2023 i jop Election pynyoo i yei chaniah ki paidbah ya ka sorkar MDA.
Da kular u leh wow wanrah wow pyndap yeiwa emkaam wa ki mat dawa kini ki seiñ katwa joh i bor yong oo deiwa ong leh wa ha u 2018 da em chiboon i sahkut su ya ka tulop kiwa kreh Muster Roll wei mar ya yoh u chna sorkar da chimkhia bha wow pynbait noh ya ini waroh wei ymtoh iwa suk neibhah ini toh i kaam wa da ieh khlem pynbait da boon snem tangwa deiwa ye u boodien wei deiwa ya krehlang suki suki da ye wow pynpliah pynryntih yei rukom su tulop heipor wa biang.
Kamtæ da sñiawkmen u wow yoo wa da mih soh ini i kreh chitom wei da yoh tulop tista ki Muster Roll deiwa pynrap wa waroh ini toh iwa da wan ym du hapoh chi sngi ar sngi wei ymtoh iwa da leh du yow yoh Vote tangwa yow chakri ya ki paidbah yow pyndooh pynwiar ya i eh i khor wa da maad ki da ki snem nachwa neibhah u pynbait ya ki kaam wa da ieh la 50 snem khlem em wa tba ymtoh iwa suk tangwa kattæ deiwa kyrchaan ki paidbah u toor chakhmat yow jop ya waroh iwa eh wa em hakhmat.
Ha kani ka yalang da pynkup burom leh ya uwi na ki khon kiwa kreh Muster Roll uwa da yoh ya ka Top 20 ha ka SSLC uni u snem.
Ya ka yalang ynne da pynlai da u Dapherborn N Suchiang uwa man u General Secretary ka AJMW & LUCEC.
Da pynphooh chooh chooh ya kani ka sngi da ki chaad wa ki rwai.
Discussion about this post