U President ka Meghalaya Pradesh Trinamool Congress (MPTC) uwa man leh u MLA ka Nongthymmai, u Charles Pyngrope da ong u wa lada ka sorkar ong ko wow pyndam noh ya ka aiñ yakhle, ka Meghalaya Regulation of Gaming Act, 2021, ye u man wa hadien wa da pyrkhat bha wa ki paidbah ym pdiang la kammon kammon ya kani ka aiñ.
U Montri wa pait ya ka chnat khrong dan (Taxation) yong ka jylla, u James PK Sangma da pynbna u ynne ka sngi wa ka sorkar daw pyndam noh ya ka aiñ yakhle wa da wanrah ha u snem 2021, wei ini i rai toh hadien wa ka sorkar ka sñiaw ko wa ye wow em i ktah ya ka jylla hadien wa da ap da ya syllok wa kiwa yahkhmat niam, kiwa yahkhmat chnong wa ki seiñbhalang.
Uwa yahkhmat ka Trinamool da ong u wa ki paidbah tip ki yei thmu yong kani ka sorkar wei na ini i daw daw em i kylla. Da ong chooh chooh wa ini i pynbna yong ka sorkar ym toh wa ka Party kawa em hei liang pyrchah jop ko næ rem ko, tangwa kam uwa yahkhmat ka Liang Pyrchah da yaklam ki ya ini wei da pynsñiaw ki yei pyrchah ya kani ka aiñ wei i pynbna yong ka sorkar ynne ka sngi toh i jop ki paidbah.
