Jowai: Ka Bharatiya Janata Party (BJP) ynne ka sngi da pynlait ko ya ka Election Manifesto yong ka neibynta ka Election Lok Sabha wei kawi na ki thong toh wow warah biang ya ka Citizenship Amendment Bill (CAB) lada poi biang ko hei bor.
Kani ka Manifesto wa e pyrtuid Sankalpit Bharat Sashakt Bharat da pynlait ynne ka sngi ha New Delhi ha yung krehkaam ka BJP heiwa da emlang u montri rangbahdooh ka ri u Narendra Modi wa u Party President u Amit Shah.
Hapoh ka bynta wa ong Nation First kani ka Manifesto, ka BJP da ong ko wa ka u yaleh hi ko wow pynman aiñ ya ka Citizenship Amendment Bill yow yada ya kitu ki bru wa khian paaid wa bood ya ka niam Hindu, Jain, Buddhist wa ki Sikh yow lait ki nei chah lehbeiñ ha ki ri wa em ki kiwa marjan waka India yow man ki kam ki tre ri wa paka ka ri India.
Da ong leh wa ka thaaiñ Northeast pyrchah ki ya kani ka aiñ tangwa daw lai pynche cha ki wa kani ka aiñ ym ktah ko ya ki wei ka BJP u yaleh ko wow yada ya ki ktien ki thlliej, ki dustur ka riti, i man kyrpang ki jaitbru wa em hapoh ka Northeast waroh kawi.
Discussion about this post