Ka A’chik Holistic Awakening Movement (AHAM) da kyntu ko ya kiwa yahkhmat wa ki seiñbhalang na ri-loom Khasi wa Jaiñtia wow pdiang yei rai ka yung bichaar neibhah wa pynmyntoi ko ya waroh ki paidbah ka Meghalaya.
Hawa kdaw yei hukum ka High Court kawa da pynmih ha ka 05-04-22, u President ka AHAM, u G. Momin da ong u wa ka yung bichaar da phah sangeh ko yei thung kreh sorkar hapoh ka jylla hadooh wym pu pynkrehkaam ya ka Roster System wei wow thung kreh hapoh ka Reservation Policy hadien wa kheiñ yeiwa da booh bhah.
Da ong u leh wa deiwa puræ ya ka hukum ka High Court da sñiawthooh wa neidaw wym em ka Roster System, ym em da biang i rukom pynkrehkaam ya ka Reservation Policy ha Meghalaya heiwa kiwa toh hok wow yoh kreh katkam ka Reservation Policy ym yoh ki. Chooh chooh da ong u wa ka High Court da kdaw ko wa khlem em ka Roster System da wailaad ko wow wanrah yei leh chiliang wa i pynemkaam bakla wei kamjooh i chim kabu da kitu kiwa em hei bor.
Da pynche u leh hawa yatoh wa ka Office Memorandum wa da pynmih ka sorkar ha ka 10-05-22, deiwa ong u wa da em ka kyndon ha ka Para-6 wa ong manda poi i por u thap kreh toh u pait ya ka Roster System yow tip sa kiwon kiwa toh u yoh bhah na ki Khasi, Jaiñtia wa Garo wa kiwi de ki ST wa SC kamjooh deiwa pait leh ya kiwa da dep dooh bhah nadooh nachwa deiwa kheiñlang noh ya kini manda lait kreh.
Chooh chooh da ong u wa ka Para-7 kani ka Office Memorandum da klam che ko wa kani ka Roster System toh du wow pyntikna donhi wa pynkrekaam ya ka Reservation Policy wei da man ko kam ka kor donhi neibynta ka Reservation Policy.
Da pynkynmoo u leh wa u Advocate General ka sorkar Meghalaya da mynjur u hakhmat ka yung bichaar wa ya ka Reservation Policy ym ye wow pynkrehkaam khlem ka Roster System.
Kamtæ da ong u wa ki sñiaw ki wym em iyi iyi leh iwa bakla hawa pynkrehkaam ya ka hukum ka High Court wow phah pynkhreh da ka Roster System hapoh Meghalaya neibhah ka yung bichaar toh kawa laitlooid wei ka hukum wa pynmih ko toh yow pynkrehkaam deiwa miat ya ka Reservation Policy.
