Jowai: Hadien wa da chah biang ya waroh ki dukan ha Iawmusiang, Jowai wow wai biang ki nadooh ynne ka sngi, neiliang kiwa kamai kari da phylla ki wa neiyi i daw wympu chah ya ki wow kamai biang kamwa chah ya ki dukan.
Hadooh ynne ka sngi dang chah ya ki kari wow kamai ki da ka Odd-Even katkam ka sngi wa ki Registration Number yong ki kari.
Kamtæ heiyatoh weini, hawa yaklam wa u DC ka West Jaiñtia Hills, u Garod LSN Dykes, da ong u wa i rai hajrong ini chong i ha ka sorkar jylla.
Chooh choh u Garod da ong u wa i chah wow wai ya waroh ki dukan toh wa neh ki chithaw don katwa ini phær i na ki kari.
Neiliang ka sorkar neipor cheipor pynmih hukum ko heiyatoh wa ki kari kamai nadooh i booh ya ki sanitizer, wow pynduna ya kiwa chong kari wot hadooh wow booh ya i pyrtuid, i thaw sah wa ki phone number yong kiwa yah kari.
Ye u man wa i daw wa chong i ha ka rai ka sorkar jylla toh wa ki kari ye ki wow lai na kawi ka District cha kawi tawon katwa kamtæ emkaam wow rai da ka sorkar jylla.