U symbood montri ka jylla u Prestone Tynsong da pynche u wa hadien wa pynkynmoo ka MHA wym toh u pynthut yei lai na kawi ka jylla cha kawi, ka sorkar jylla u lai hi ko chakhmat kamwa da thmu wow khang man ka chi tayaw ka tayaw nyngkong u September, October wa November uni u snem ya waroh ki thaw psiah namo ki Entry Point kiwa em hapoh ka jylla.
Da ong u wa ka sorkar da pynchong yurim ko yeini wa ym man i iwa ye dei bor bru wow phah kreh ya kini ki Entry Point 24 kynta man ka sngi, kamtæ ki wakreh leh emkaam chuti ki wei kamjooh leh e laad ko wow siat dawai wow pynkhooid ya kini ki thaw wa pdiang ya kiwa liwan chapoh ka jylla.
Da ong u leh wa ym em khang yei lai i wan ki kari wa kit yei mar wa emkaam kamjooh ki kari wa lai luti lyngba ka jylla cha kiwi ki jylla.
Da pynche u leh wa ki kyndon wow psiah chapoh ka jylla dang neh hi ki kamjooh wei ym em pynkylla ya ki. Wei ini i pynbna ynne ka sngi toh yow lait wa em kiwa sñiawthooh bakla yeiwa pynbna ka sorkar pyrdi, ya em kiwa pyrchang wow liwan chapoh ka jylla heipor khang ya ki Entry Point.