January 10, 2023
Kam chibynta ka pynpsiah dkhot namo ka Enrollment Drive yong ka UDP Jowai Circle kawa da pynman ha ka 9 tarik uni u bnai ha ka chnong Sohmynting kawa da pynlai da u Lephing Pyrtuh, waheh chnong warim; da ong u ka chnong Sohmynting toh ka chnong kawa maya Party ri-loom, weiwa kani ka Party toh kawa boon dooh wa rah i roi i paar hapoh ka chnong nadooh ki sarok pohchnong, ki Community Hall, i pynyoh bordiñ cha ki kyntoit waphær waphær, ka umbaam umdih, ka Secondary School, ki madan lehke wa kiwi kiwi ha ki por wa man MLA u (L) S. Mulieh (UDP).
Da ong haroh u wa oo ym pu jooh em kyrchaan u ya ka UDP tangwa ha kani ka kynti hadien wada bichaar bniah bha u, da jied u ya ka UDP hajrong kitai ki yurim wei kamjooh leh wa em i mynsien yoo wyrai u ya u Moonlight Pariat uwa da yaleh ya kani ka Election kawa 4 ha kani ka kynti hanlada man u yei rem ha kini ki 3 sien wa dadep tangwa ka bhah Vote yong oo ku ko na kawi ka Election cha kawi pynyoo ko i kyrmen wow poi u cha ka thong, weiwa man u leh u bru uwa da ih hei pyrkhat pyrdaiñ.
Ha kani ka sngi da pynskem leh ya kiwa kitkaam ka UDP ha Sohmynting da u Moonlight Pariat, President UDP West Jaiñtia wa u Kitboklang Nongtdu, General Secretary UDP West Jaiñtia wei kiwa ksohkaam man ki kamni ha wah:
Sohmynting Pyllun UDP
- President- Salan Pohleng
- Vice President- Ham Suting
- Secretary- Neverturn Daw
- Asst Secretary- Emiphal Dkhar
- Advisor- Lephing Pyrtuh
Ki Executive Member waroh ki Officials na ki Unit kiwa em hapoh ka Sohmynting Soo Dong man ki kamni ha wah:
DONGDIEN UNIT
- President- Rilang Pyrtuh
- Vice President- Bnai Suting
- Secretary- Petros Pyrtuh
- Assistant Secretary- Skhem Pyrtuh
Da jied 20 ngut ki Executive Member.
DONGNEIN UNIT
- President- Osi Dkhar
- Vice President- Humphri Pyrtuh
- Secretary- Lutmon Pyrtuh
- Assistant Secretary- Lat Dkhar
- Advisor- Coming Pyrtuh
Da jied 24 ngut ki Executive Member.
DONGWAH UNIT
- President- Ham Suting
- Vice President- Wailad Suting
- Secretary- Friday Ryngkhlem
- Assistant Secretary- Kerlang Phawa
Da jied leh 24 ngut ki Executive Member.
DONG IAW PYNSIN UNIT
- President- Salan Pyrtuh
- Vice President- Mar Rynjah
- Secretary- Rihunlangki Pyrtuh
- Assistant Secretary- Wiwotshuh Lipon
Da jied 17 ngut ki Executive Member.
Hei klam tbian u Moonlight Pariat, da kyntu u ya kiwa ksoh kaam wow kreh ki nadooh mynsien wow pyntikna wa ka UDP u yoh ko yei jop na ka 2-Jowai Constituency wei da kular u wa kamwa kreh u MLA warim ka UDP, u (L) Singh Mulieh, wow nang kreh chooh chooh u hei wow wanrah ya ka roi ka paar nadooh kiwa dang sahteiñ ki dak kti u Singh Mulieh kamjooh leh kiwa thymme.
U Kitboklang Nongtdu, Secretary ka UDP West Jaiñtia da kyntu u wa emkaam u bichaar bha ya ki kyrtong kiwa yakun MLA dei wow pait i ya u bru u wym chah khyrwait chabi ha kiwi tawon wei toh u jied i ya u Moonlight Pariat uwa yakhun ya kani ka Election la 4 sien uwa yieñ da ki kjat ki kti wei dei bor pyrkhat pyrdaiñ i yong oo hi.
Da yoh leh yei klam tbian na u Sanbok Rymbai, u Biful Lamar, u Baitlang Pohsngap wa u Allwyn Laoo.
