U Asst. Secretary ka Seiñraij Jowai, u Wyraiki Kharbuki ynne hawa klam wa kiwa pathai khubor da ong u wa ka Chaad Niam Behdieñkhlam toh wow pyntip cha ka pyrthai, ka ri wa ka jaitbru heiwa man ko ka kaam paidbah wei daw em i thut hei lai i wan ki kari.
Da ong u wa kam chibynta wow pynsuk ya i lai i wan da krehlang chirup wa ka Police Department.
Chooh chooh da ong u wa katkam wa ya pynbait, ki kari wa wan na liang Shillong wow lai cha liang War Jaiñtia ye ki wow lai na u sarok wa dang thymme na Khliehtyrchi wa mih ha Treiongriang, kiwa lai cha liang Ladthadlaboh ye ki wow lai na Riatmuleiñ (GHM), kiwa wan cha Jowai ye ki wow lai na u sarok Chahtngit (nawah Pertrol Pump Challam Syngkon) wow mih ha Riatsasim.
Da ong u wa ha ki sngi Behdieñkhlam ym ye wow pynyieñ kari ha Madan Datlawakor (Stand War hadooh ki madan wa em ha Quarter DC) wei kamjooh ha ka 9 tarik i janmiet wow em ka Datlawakor ym ye wow pynyieñ kari ha kini ki thaw.
Heiyatoh wa ki thaw pynyieñ kari ha ka 9 tarik u July kawa man leh ka sngi noh Rot, ye ki paidbah u booh kari ha Madan Jrisaleiñ, ha ki madan ka Seiñraij wa em ha Iawmusiang, ha Madan Ryngkaw wa em ha Tpep Pale deiwa psiah na Mission Compound wow mih ha Tpep Pale katwa ki Invitees ye ki wow booh kari ha Parking Lot wa em ha Mooliksoo.
Discussion about this post