U Montri wa pait ya i puræ puthi ha ka jylla, u Lahkmen Rymbui da ong u wa i rukom seiñ wa i rukom pynlai ya ki skur Samagra Shiksha Abhyan (SSA) ha Meghalaya phær i lada nujor wa kiwi ki jylla, neibhah ya ki skur wa kiwa sikai SSA ymtoh kiwa pait da ka sorkar wei ka jylla em ko hadooh 5166 tylli ki skur SSA wei kiwa sikai em ki hadooh 12,541 ngut.
Hawa jubab ya ka phang (Short Duration Discussion) wa da wanrah da u MLA ka Mawsynram, u HM Shangpliang hajrong i wym yoh tulop kiwa sikai SSA la 5 bnai kattu, u Lahkmen da ong u wa ka sorkar jylla toh du kam kawa e poisa katkam ka bhah wa da yoh na ka sorkar India, neibhah ya ki skur SSA da pynlai da ki seiñ niam, ki seiñ kreh monsñiawbha, ki bru samen wa ki chnong wei ya kiwa sikai leh da thung bait da ki School Managing Committee.
Da ong u wa lada nujor wa kiwi ki jylla kam ka Assam wa em 32,469 ngut kiwa sikai SSA ha ki 15,396 tylli ki skur, ha Arunachal Pradesh 6594 ngut ha ki 939 tylli ki skur SSA, katwa ha Mizoram em 2193 ngut ha ki 824 tylli ki skur wei ya ki skur SSA ha kini ki jylla da pynlai wei da pait bait da ka chnat puræ puthi kini ki jylla.
Heiyatoh wa i slem ka tulop, u Lahkmen da ong u wa ka sorkar jylla ym jooh pynslem ko wow pynlait yaka tulop hawa da yoh ya ka poisa na ka sorkar pyrdi, heiwa da pyntip u wa ka sorkar pyrdi da pynlait ko kajiak ka poisa ha ka 21 Naisan 2021 katwa ka jylla da pynlait noh ko wow su yaka tulop ha ka 24 Naiynru 2021 wei kamtæ ter ter.
Da pyntip u leh wa ka sorkar jylla da yaleh ko wow pynlait noh chwa 2 bnai ka tulop kiwa sikai SSA na ki 5 bnai kiwa dang sah deiwa pynrap leh wa ka chnat da yaleh ko katwa ye wow su noh chwa ya ka tulop kawa 2 bnai.
Neiliang u HM Shangpliang da ong u wa toh u chimkhia ya kiwa sikai SSA wei toh leh wow burom ya ki, heiwa da ong u wa ha ki snem wa dadep 5,814 ngut kiwa sikai Lower Primary wa 6,727 ngut kiwa sikai Upper Primary yong ka SSA ymye ki wow pynsñiaw yei eh i khoo yong ki khamtam wow dawa na ka sorkar wow pait noh da ka chnat puræ puthi ka jylla katkam ki kyndon ka RTE wa SSA.
