Shillong: U MDC ka NPP na Nongkrem, u HS Shylla da ong u wa i sahkut ki Bill yong ka KHADC ha yung u Lat ka jylla wei kamjooh ha ka sorkar jylla toh neidaw ka kyndon kawa 3 yong ka Sixth Schedule kawa ong wa kiwon kiwon ki Bill wa da mynjur da ki ADC ym ye ki u man aiñ katwa ym pu yoh ya ka mynjur na u lat, kawa e mon ha u Lat ka jylla wow leh u katwa sñiaw biang u ya ki Bill kiwa da hun ki District Council wei ye u ksoh ki khlem mynjur wei khlem e daw.
U Shylla da ong u wa ya ini hawa ya chimbynta wow yaklam ya ka phang wa wanrah da u MDC ka liang pyrchah na Shella u Teinwel Dkhar uwa da ong wa du ka Executive Committee wa yakhmat da u Pynshngain N Syiem toh ka wym jooh chna ya ki aiñ hanlada klam u yei maya jaitbru katkam wa mih cha ki khubor heipor wa yatai ñia ya ka mang tyngka wa wanrah da u CEM.
Heiyatoh waka Village Administration Bill da ong wa toh u pyndam chwa ya ki bynta wa klam chaphang waroh ki Hima wow thoh wow pynbait (Codify) ya ki riti dustur.
Katkam wa ong u Shylla, da em ki Hima ki Elaka kiwa da dep pynbait tikna ya ki dustur riti yongki tangwa em leh ki wym pu em leh ya ini wei toh u pyndep noh ki ya ini wei lada ym leh ki, ka Council u chna noh ko ya kini da ka aiñ.
U HS Shylla da kyntu u le ya ka Executive Committee (EC) kawa yahkhmat da u Pynshngain N Syiem wow thoh ko cha kitu ki Khasi kiwa e jait cha u pa wa toh u pynbait noh ki wei lada ym leh ki, ka KHADC toh u leh ko yeiwa emkaam katkam ka aiñ Khasi Lineage Act 1997.
Da ong u wa katkam kani ka aiñ, du ki Khasi kiwa e jait cha ka bei toh ki Khasi neibhah ini toh wa da seiñ pyrkhat seiñ dur yong u warim wajah ka jaitbru Khasi yow lait na ka sang ka ma wa i chong kurim bakla.
Ka Council ynne ka sngi da mynjur ki ya ka mang tyngka neibynta u snem 2018-19 kawa da kynjoh T. 213, 53, 36, 970 kawa duna leh T. 49,560.
Kani toh ka sien wa nyngkong ha i parom ka KHADC wa ya ka mang tyngka da wanrah neibynta waroh chi snem ym toh ha ki por wa da dep kawa man du neibynta ka le bnai.
(Feature Image-File Photo)
Discussion about this post