U Montri Rangbah ka Jylla, u Conrad K Sangma da ong u wa i thang mombati ki seiñbhalang ha ka sngi lehkmen yei dap 49 snem ka jylla ymtoh sakhiat i yakhih.
Ka Confederation of Meghalaya Social Organisation (CoMSO) ynne ka sngi da khut pynman ko ya i yakhih wa jaijai deiwa thang mombati wow dawa pynkrehkaam ya ka ILP wa ka MRSS Amendment Bill 2020, wow pynbait ya u pood kamjooh wow dawa pynpsiah ya ka ktien Khasi ha ka Eight Schedule.
U Conrad da ong u leh wa i thang mombati da ka CoMSO toh i dak wow pynsñiaw burom wei sñiawngooh ya kiwa da yakhun wow yoh ya ka jylla wei ka sorkar ym kheiñ ko wa ini toh i yakhih.
Heiyatoh wa u pood wa ka Assam, u Conrad da ong u wa i kajia pood toh iwa da slem wei ka sorkar da yaklam ko yeini da boonsien ha ki kyrdan waphær waphær kammon wow pynbait noh yeini.
Da ong u leh wa toh u yachem u wa u Montri Rangbah ka Assam ha u snem wa dadep tangwa nei wan ka khlam COVID-19 da sepai noh i, wei kattæ dang pynkhreh ya ka Election ha Assam wei boi hadien ini ka sorkar daw yoh ko u yaklam pura heiyatoh wa ini.
