I thaw ka PWD ha Jowai toh iwa miat bha yow booh yaka Mini Secretariat kawa daw em ki chnat sorkar hapoh kawi ka yung donhi: Conrad

Ynne i janmiet u montri rangbah ka jylla, u Conrad Sangma chirup wa u montri ki kaam pohyung ka jylla, u Lahkmen Rymbui wa u MLA ka Jowai, u Wailadmiki Shylla da lai pait ki ya i thaw wa thmu wow chna ya ka Mini Secretariat namo ka District Secretariat ha i thaw wa em ki yung krehkaam ka PWD ha Ladthadlaboh, Jowai. 

Hawa yaklam wa kiwa pathai khubor hadien i lai pait ya kani ka thaw, u Conrad da ong u wa i thmu wow chna ya kani ka Mini Secretariat toh wow pynjanai ya i chakri ka sorkar MDA ya ki paidbah ka jylla. 

Da ong u wa heiyatoh wa ini da yaleh u wanrah ya ka aiñ wow pynbiang ya i chakri ka sorkar ya ki paidbah. 

Chooh chooh da ong u wa deiwa leh yeini i chna ya ka Mini Secretariat, waroh ki chnat sorkar u em ki du ha kawi donhi ka yung (One Roof) neibhah ngait skem ki wa i chna ya kani ka Secretariat ha Tura wa ha Jowai daw yarap bha ko ya ki paidbah ha kiwa boon ki liang. 

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Da pyntip u leh wa i thaw ha Jowai (PWD) man i iwa miat bha neibhah ym du wa em i hapyrdi ka Jowai tangwa lait liang lut ki sarok cha kani ka thaw, iwa man leh iwa chngaaiñ, daw booh leh yaki CCTV wei yooluti wow sdang noh ya ini i kreh. 

U Conrad da ong u wa ka sorkar thmu ko wow wanrah ya ki kaam pynroi ha ki chnong wa heh (Town) ka jylla.

Neiliang u Wyrta da kylli u heiyatoh wa ka mynried yong ki yung krehkaam ki chnat sorkar waphær waphær hadien wa wanrah ya ki ha iwi i yung donhi wei neiliang u Conrad da ong u wa ini waroh chong i ha ki rukom krehkaam ki chnat wei ki wow pyrkhat kammon u leh ya ki thaw wa jooh pynemkaam ki hadien wa kyrriah ki cha ka yung wa thymme wei ki wakreh u neh ki kamjooh hi. 

Heiyatoh won wa i por wa mynnu u sdang i kreh ya kani ka Secretariat, neiliang u Conrad da ong u wa dang chim wot ya kani ka rai wei yooluti u wa ym slem de i kreh daw sdang i. 

Khaddooh neiliang u Wyrta da kylli u hajrong i takhooh i leh ka sorkar wow wanrah ya ki chnat sorkar ha iwi i yung wei i kyrriah ya ka PWD Jowai North Division cha Shangpung na Jowai, u Conrad da ong u wa katkam wa man hi ym em wot tang chi kilometer u sarok hapoh kani ka Division kiwa em ha Jowai wei i leh ka sorkar u man i iwa salonsar deiwa pyrkhat yeini liang wanang.