U Working President ka United Democratic Party (UDP) uwa man leh u MDC ka Jaïaw, u Paul Lyngdoh da ong u wa ka jaitbru Khasi-Jaiñtia toh ka jaitbru kawa da rim bha, wei chwa wow em ka ri India da tip chwa ya kiwa chong chnong yong kani ka jylla kam ki jaitbru tynre ka jaitbru Ynñiawtrep Ynñiawwasa.
U Paul da ong u yeini hawa pynuiñ ktien yeiwa klam u khliehdooh ka Rashtriya Swayamsevak Sangh (RSS), u Mohan Bhagawat uwa da ong wa waroh kiwa chong chnong ka ri India toh ki Hindu ha ka yalang wa pynman ha Shillong.
U Paul da kylli u wa na kawon ka bynta næ neiwon pait u wow ong wa u Khasi da man chwa u Hindu wei yeini hap kylli na uwa klam, neibhah hei sakhiat katkam ka History ka jaitbru Khasi Jaiñtia toh kawa da rim bha.
Kam wow kdaw heini wa u khliehdooh ka RSS, u Mohan Bhagwat ha ka yalang wa da man ha ka sngi Bibar ha Shillong, da ong u wa ka RSS ymtoh ka seiñ wa pynkylla ya ka niam, neibhah waroh da man chwa ki ki Hindu wei i kyntien Hindu ym mut i ka niam tangwa ka rukom im.
Ha iwi i liang u Paul da ong u wa ymye u wow batai iyi i daw wa pynman ya u heh ka RSS wow klam ya kini ki kyntien khamtam wa ka jylla sah ko du soo bnai wow lai cha ka Election MLA.
Puræ leh: Ym em kwah pynkylla niam neibhah i waroh toh ki Hindu, ong u heh ka RSS ha Shillong
