Heiyatoh wa i pdung Bomb Improvised Explosive Device (IED) hei miet ka 9 tarik heipor kamwa 10:30 hapoh iwi i yung trep wa sap da ka Tin iwa em hei thaw pynyieñ Bus ha Punjabi Lane, Them Metor, Mawlonghat.
Neiliang u SP ka East Khasi Hills, u Rituraj Ravi da pyntip u wa ya uni u Bomb da booh hapoh ka kynja nar wei u Bomb toh uwa da suba da chna da ki Gelatin Sticks namo ki Dynamite wei heipor wa pdung uni u Bomb da piah leh ki yit ki yung ki sem wa em chajan heiwa da em uwi u bru wa lai luti na ini i thaw uwa tip kam u Lakhan Singh da mynsoo u malu mala ha ki bynta ka kjat neidaw wa hær ki tiar ki tar nei bor ini i pdung.
U SP da ong u wa deiwa pait yei rukom chna ya u Bomb wei i rukom leh ya ini i kaam da sariem bha ki dak kti ka HNLC kamwa da dep jia nachwa. Tangwa hadooh kattæ ym pu em kawon kawon ka seiñ wa da wan chakhmat wow kam yeiwa emkti u leh yeini.
Chooh chooh da pyntip u wa da dep booh FIR da ki pulit hi ha Sadar PS yow pynman yaka takit hapoh ka aiñ Unlawful Activities (Prevention) Act waka Explosive Substances Act wei daw kem leh ya kitu kiwa emkti ha ini i kaam, heijooh i por leh da khut u yei ya krehlang ki paidbah.
Da tyrwa leh Rs. 1 lak cha kiwa yarap ya ki pulit wow kem ya kiwa emkti wei ya kitu kiwa wan chakhmat wow pyntip daw murieh yei pyrtuid ki wei ye ki wow pyntip cha ka Special Cell deiwa Phone, Text, WhatsApp ha u Number-9366790273 næ deiwa email ha [email protected].
Discussion about this post