Shillong: U montri wa pait ya ki kaam pohyung ka jylla, u Lahkmen Rymbui da ong u wa i kam ka Hynniewtrep Nationa Liberation Council (HNLC) wa da tympdung ko ya u bomb Improvised Explosive Device (IED) ha East Jaiñtia Hills, ka chnat pulit dang takit ko hajrong ini wow chem yeiwa sakhiat.
Kam wow kdaw heini, neiliang u Sainkupar Nongtraw uwa man u General Secretary wei kam u Publicity Secretary ka seiñ, da kam u wa ka HNLC da emkti ko wow tympdung ya uni u bomb IED ha ka 27 taik uni u bnai ha Sookilo, kawa haap ha ka Elaka Sutnga, East Jaiñtia Hills District, wei i daw wa tympdung ya uni u bomb toh wa e laad u Dolloi ya ki baar jylla wow leh ki ya ki kaam wa man pyrchah aiñ wa ha rukom nadooh ki kaam yakhle, ki khayi pyrchah yaka aiñ wa ki dai kynthai kiwa man pyrchah yaka imlang sahlang.
U Rymbui da ong u wa ini i jia waroh ympu ye u pynsakhiat neibhah wa ympu yoh ya ka bui na ka sorkar wei ye i u man wa da leh yeini du da ki bru wa chimkabu donhi wow pynthut yei chongsuk hapoh ka jylla wei ini waroh daw wanrah i du yei doohnong ya ki paidbah wa ka jylla waroh kawi.
Kam wow kdaw heini, ka HNLC da tyrwa ko cha ka sorkar wa kwah ko wow wan chaphrang wow yaklam yasuk wei hajrong ini neiliang u Lahkmen da ong u wa lada ka HNLC kwah ko wow yaklam yasuk emkaam wow pynyoo ko ya ki kaam wei ka sorkar daw chimkhia ko yeini deiwa pynrap leh wa ka chnat pulit daw leh ko yei kaamram yong ka wow wanrah yei chongsuk.
