Kawa mihkhmat ka All India Congress Committee (AICC), ka Bobeeta Sharma da ong ko wa ka BJP daw ngooid ko ya kiwi ki party khian ha Meghalaya, heiwa da ong ko wa i leh ka BJP man kam wow maham ya ka NPP leh ha kani ka jylla.
Ka Bobeeta ryngkat wa u Mathew Anthony kiwa man ki Media Coordinator ka AICC da wan ki cha nongbah Shillong ynne ka sngi.
Hawa yaklam wa kiwa pathai khubor, ka Bobeeta da ong ko wa ka BJP em ko du 2 ngut ki MLA ha Meghalaya, wei da kylli ko leh ya i booh wa i wah ya ki dur u Modi wa ka BJP ha kani ka jylla hawa u Montri Rangbah ha Meghalaya toh uwa na ka NPP, deiwa pynrap leh wa ka NPP hap syndong bha ko ya ka BJP.
Ka Bobeeta da ong chooh chooh ko wa u State President ka BJP, u Ernest Mawrie da pynbaad u ya kani ka sorkar MDA kawa da yahkhmat da ka NPP wa man ko kawa baam-tooh, tangwa ka BJP ym em u randien ko wow krehlang wa kani ka sorkar, wei ini toh i dak wa lada ka NPP ym syndong ko tæ daw chah ngooid ko ha ka BJP.
Neiliang u Anthony Mathew da e nongmuna u leh ya kiwi ki jylla neibhah ka BJP kam ha Bihar u Nitish Kumar da pynlait noh u ya i krehlang wa ka BJP, kamjooh ha Maharashtra wa ka Shiv Sena wa ha Tamil Nadu wa ka AIADMK, da pynrap u leh wa ha kini ki jylla ka BJP da krehlang ko wa ki seiñ tre ri wei da pynjæd ko ya ki, deiwa pynrap chooh chooh kammon ka NPP ym em ko hei maa na ka BJP.
