U Bashailang Khongwir, BJP National Council Member da kyrchaan u yei rai u Montri Rangbah ka Meghalaya wow pdiang ya waroh 5 ngut ki MLA ka Congress hapoh ka sorkar MDA.
Da mynjur u leh yei ong u AL Hek wa i psiah ki MLA ka Congress cha ka sorkar daw yarap ko ya BJP neibhah ha waroh kini ki snem da dep pynbaad ki man-i-por ya ka BJP wei kattni da pynyoo wa waroh ini i pynbaad man ki kiwa khlem yurim.
Da ong u leh wa ini i kyrchaan ki ya ka sorkar pynyoo wa ki da psiah lang ki waka NPP, UDP wa BJP hapoh ka MDA kiwa da yaleh bor bah ha ki Election yow pyndooh jait ya ka Congress ha Meghalaya.
“Ka BJP kam ka Party toh u kmen ko ya ini neibhah daw yarap ko ya ka Party ha ki Election ki 5 tylli ki jylla,” da ong u Khongwir deiwa pynrap wa i thong u Modi wow pyndooh ya ka Congress na India da sdang i na Meghalaya.
U Bashailang Khongwir da ong u wa heiyatoh wa i pynkut yei ya krehlang namo wym boi pynkut chong ko ha ka BJP Legislature Party. Wei ini mut ko wa i rai chong ko ha waroh ar ki MLA wei ym toh i rai yong ka seiñ, kamtæ kiwa yahkhmat ka Party ym emkti ki ha ini i kaam.
Da ong u leh wa i kyrchaan ki MDC ka BJP ya ka Trinamool Congress ha GHADC toh leh i rai yong ki hi wei hei sñiaw yong u Khongwir ym emkaam wow pyntip ki cha u President ka Party. Kamtæ toh u lehkmen wa ka Meghalaya da lait ko naka Congress heithaw wow pyrkhat lada toh u pynkut noh yei ya krehkaam lang.
