Ka Boundary Committee yong ka Khasi Hills Autonomous District Council (KHADC), hadien wa pyrchah da kiwa boon ya ka soskular sñiawthooh yumut namo ka MoU kawa dadep soi hapyrdi ka jylla Meghalaya wa Assam yow pynbait ya ki khappood yong kini ki ar jylla, ynne ka sngi 18 tarik da lum ya ki khlieh wa synchaar yong ka Hima Mylliem, Jirang, Nongspung, Nonglang wa ka Hima Jyrngam.
U Executive Member ka KHADC wa pait ya ka Elaka, u Jambor War da ong u wa ini i khut ka KHADC ya ki khlieh synchaar toh neidaw wa ka sorkar da soi ko ya ka soskular khlem yatoh katkam ka bui (Report) wa da phah da ka KHADC cha ka sorkar wei khlem yatoh leh katkam ka Report ki Regional Committee yong ka sorkar, iwa da wanrah katni yei wym hun ki paidbah wa i kynrum kynram.
Da ong wa ini i kaam man kawa khia wei ka KHADC daw chong biang ko ha ka 26 tarik uni bnai wow e rai wa khaddooh.
Da ong u wa i wym kynthup yong ka sorkar ya ki tre thaw, ki Hima wa ya ka District Council, wei ka yasoi murieh ya ka soskular namo ka MoU da pynman ya ki wym hun wei hap wow pynbait biang ya ini i kaam.
Kam wow kdaw heini wa neiliang ka sorkar da pynksan ko ya ka soskular wa da dep u yasoi, wei da klam che leh wa man iwa eh ya ka sorkar wow pait biang ya ka MoU. Tangwa hawa kylli ynne ka sngi, u Jambor War da ong u wa chong ha ka sorkar jylla wei ka KHADC nadooh wa sdang ya u pood u ang yong ka District Council man u thij katkam u pood u ang ki Hima ka Council, wei ya ka Report leh da phah cha ka sorkar.
Hawa kylli chooh chooh, da ong u wa lada ka sorkar ym bien de ko wow pynbait thymme ya ka MoU, hadien ka rai kawa daw chim ha ka 26 tarik, neiliang ka Council u yaklam ko yow pynbait wa ki Hima neibhah ki toh ki tre thaw, kammon wow lai chakhmat neibhah i hok yong ki tre thaw ym kut du ha ka sorkar lylla lane ka sorkar pyrdi.
Neiliang u Bindo M Lanong, MDC da ong u wa ka KHADC ka yieñ bait ko ha ka yurim neibhah ki kaam Hima haap ki hapoh ka District Council wei ka District Council ka tip ko wei ym em i eh. Da ong u wa hajrong ki yurim wa ki Map wa ki khana pateiñ ym em eh wow pynbait biang ya ka MoU.
Neiliang won uwa yahkhmat ka Liang Pyrchah ha KHADC, u PN Syiem da ong u wa ki kynhun lane kiwa embynta ha ka Regional Committee ym em chah khut ki wow ya e mynjur lang neibynta wow soi ya ka MoU. Da ong u wa ka Assam wa ka Meghalaya ki yaphær ki chiboon neibhah ki toh da ki thaw sorkar, katwa ha Meghalaya toh ki thaw wa haap hapoh ka District Council wa ki Hima, ki Raid wei lada ym yoh lang ya ka rai na kini kammon u ye wow soi ya ka soskular lane MoU.
