U kyrtong ka Congress na Sohïong Constituency, u S. Osborne Kharjana da ong u wa ka Congress ha Sohïong katni yakhun ko wa ka sorkar synrop yong ka BJP, katæ pyrchah ko ya ki kitu ki seiñ kiwa yakrehlang wa ka NPP ha ka Sorkar MDA-II, deiwa pynrap wa i wan yong u Narendra Modi hawa pynsmai Montri pynyoo che ko wa ka sorkar Meghalayatoh toh kawa da synchaar da ka BJP.
Da ong u wa ki seiñ Ri-loom chwa ka Election da beiñ ki ya ka NPP wei da kbai ki chwa Election wa ym kreh ki wa ka NPP næ ka BJP, tangwa hadien wa mih yei jop hadien wa ñiaw Vote da sakhi wa ka seiñ UDP kawa ki paidbah yooluti bha ki wow yah ya kani ka Sorkar wa thymme pathan sop-sop da lai synrop ki wa ka NPP.
Da ong u wa ha Sohïong iwa emkaam tam toh wow yoh u jied ya uwa mihkhmat (MLA) kam ha ki por nachwa, wei hadien wa ki paidbah yoo ki ya ka luti wow UPI i myntoi waroh wa i. Da ong u leh wa i pynslem ya ka Election ha Sohïong ye ko wow poi cha ka thong.
Hawa kylli, kammon ki paidbah ka Sohïong u jied ki ya ka Congress kawa da em chwa ha ka liang pyrchah, neiliang u kyrtong ka Congress da ong u wa u bru wa chong chnong ha ka Liang Pyrchah ym dooh myntoi ki. Wei ki scheme wa da mang chwa ymye wow pyndooh ya ki.
Da ong chooh chooh u wa lada ka Liang Pyrchah ymye ko wow bichaaar ya iwa leh ka sorkar, ka sorkar daw leh ko katwa ngait wei lada ka Liang Pyrchah khlan ko, ka sorkar ymyæ ko wow kyntait u kreh neibynta yong ki.
